Strait of Hormuz Crisis Pakistan Opens Karachi Port to Global Trade
اردو انٹرنیشنل (مانیٹرنگ ڈیسک) عرب نیوز کی خبر کے مطابق مشرقِ وسطیٰ میں بڑھتی کشیدگی اور سمندری تجارت میں رکاوٹوں کے خدشات کے پیش نظر پاکستان نے عالمی کارگو ٹرانس شپمنٹ کے لیے کراچی بندرگاہ کی خدمات پیش کر دی ہیں۔
کراچی پورٹ ٹرسٹ نے اپنے بیان میں کہا ہے کہ موجودہ علاقائی صورتحال کے باعث عالمی تجارت اور تیل کی ترسیل متاثر ہونے کا خدشہ ہے، ایسے میں کراچی بندرگاہ بین الاقوامی شپنگ کمپنیوں کو محفوظ اور قابلِ اعتماد متبادل فراہم کر سکتی ہے تاکہ سمندری تجارت کا تسلسل برقرار رکھا جا سکے۔
کراچی پورٹ ٹرسٹ کے چیئرمین شاہد احمد کے مطابق ادارہ عالمی بحری برادری کو مؤثر اور محفوظ بندرگاہی خدمات فراہم کرنے کے لیے مکمل طور پر تیار ہے۔ ان کا کہنا تھا کہ کراچی بندرگاہ کے ذریعے خطے کی مختلف بندرگاہوں کے لیے کارگو ٹرانس شپمنٹ کی سہولت فراہم کر کے عالمی سمندری تجارت کے استحکام اور تسلسل کو یقینی بنایا جا سکتا ہے۔
پورٹ حکام کے مطابق اس صلاحیت کا عملی مظاہرہ اس وقت دیکھنے میں آیا جب بین الاقوامی جہاز ایم وی ٹی ایس ٹاکوما اور ایم وی ٹی ایس سڈنی کراچی پہنچے اور بڑی تعداد میں کنٹینرز اتارے۔ یہ کنٹینرز بعد ازاں کراچی سے مشرقِ وسطیٰ کی جبل علی بندرگاہ منتقل کیے جائیں گے۔
یہ پیش رفت ایسے وقت میں سامنے آئی ہے جب ایران اور امریکہ کے درمیان کشیدگی کے باعث خطے میں فضائی پروازوں، فوجی سرگرمیوں اور بحری نقل و حمل پر اثرات پڑ رہے ہیں۔ عالمی تجارت کے لیے انتہائی اہم آبنائے ہرمز بھی اس صورتحال سے متاثر ہو رہی ہے، جہاں سے دنیا بھر میں منتقل ہونے والے خام تیل کا تقریباً 20 فیصد گزرتا ہے۔
وفاقی وزیر بحری امور جنید انوار چوہدری نے بھی حالیہ بیان میں کہا ہے کہ موجودہ صورتحال میں گوادر بندرگاہ بھی ٹرانس شپمنٹ کے حوالے سے اہم کردار ادا کر سکتی ہے۔
