اردوانٹرنیشنل (اسپورٹس ڈیسک) تفصیلات کے مطابق پاکستان کے سابق کپتان سرفراز احمد نے اتوار کو پاکستان سپر لیگ (پی ایس ایل) کے 10ویں ایڈیشن سے قبل سابق چیمپئن کوئٹہ گلیڈی ایٹرز سے علیحدگی کا اعلان کردیا۔
پاکستان کے سابق کپتان نے یہ اعلان مائیکرو بلاگنگ ویب سائٹ انسٹاگرام پر فرنچائز کے مالک ندیم عمر کے ساتھ اپنی ایک تصویر شیئر کرتے ہوئے کیا۔
سرفراز نے لکھا کہ آج میں آپ کو بتانا چاہتا ہوں کہ کوئٹہ گلیڈی ایٹرز کے ساتھ میرا وقت ختم ہو گیا ہے اور مجھے اس بات پر بہت فخر ہے کہ اس شاندار ٹیم کے ساتھ میرا 9 سال کا سفر شاندار اور خوبصورت رہا ہے۔
میں اس موقع پر ندیم بھائی کا شکریہ ادا کرنا چاہتا ہوں کہ انہوں نے مجھے اپنی ٹیم کے لیے کھیلنے کا موقع دیا اور وہ سب کچھ فراہم کیا جس کی مجھے بطور کھلاڑی اور کپتان کی ضرورت تھی اور میں اس وقت آپ کی حمایت کو ہمیشہ یاد رکھوں گا۔
میری نیک تمنائیں ہمیشہ آپ کی ٹیم کے ساتھ رہیں گی اور آخر میں میں آپ کی ٹیم مینجمنٹ کا شکریہ ادا کرنا چاہوں گا جو بہت اچھے رہے اعظم بھائی کا خصوصی شکریہ۔
سرفراز جو کہ لیگ کے آغاز سے ہی کوئٹہ گلیڈی ایٹرز سے وابستہ تھے، کو سابق چیمپئنز نے رواں ماہ کے شروع میں ریلیز کیا تھا اور اس طرح وہ 2016 کے افتتاحی ایڈیشن کے بعد پہلی بار پلیئرز ڈرافٹ کا حصہ ہوں گے۔
وکٹ کیپر بلے باز نے گلیڈی ایٹرز کے لیے پی ایس ایل کے 86 میچ کھیلے اور سات نصف سنچریوں کی مدد سے 29.32 پر 1525 رنز بنائے انہوں نے 2019 میں گلیڈی ایٹرز کو ان کا پہلا اور واحد پی ایس ایل ٹائٹل بھی دلایا۔
