اردوانٹرنیشنل (اسپورٹس ڈیسک) تفصیلات کے مطابق پاکستان کرکٹ ٹیم کے اوپنر صائم ایوب نے لندن میں میڈیکل چیک اپ کے بعد اپنا پہلا بیان شیئر کیا ہے۔
صائم نے ماہر ڈاکٹر ڈیوڈ ریڈفرن سے ملاقات کی تھی اور جمعرات کو سینٹرل لندن کے کلینک میں اس کا معائنہ بھی کیا گیا تھا۔
صائم نے اپنا دوسرا چیک اپ مکمل کیا اور اسے ہسپتال سے فارغ کر دیا گیا اس موقع پر بات کرتے ہوئے انہوں نے انکشاف کیا کہ ‘ڈاکٹر نے مجھے بتایا ہے کہ میرے ٹخنے میں بہتری آ رہی ہے اور میں اب اپنی ٹانگ کا وزن برداشت کر سکتا ہوں۔
انہوں نے مزید کہا کہ ان کی ٹیسٹ رپورٹس مزید جانچ کے لیے میڈیکل پینل کو بھیجی جائیں گی۔
اسسٹنٹ کوچ اظہر محمود نے بھی صائم کی حالت پر راحت کا اظہار کرتے ہوئے کہا کہ اللہ کا شکر ہے کہ صورتحال میں نمایاں بہتری آئی ہے سرجری کی ضرورت ہوگی یا نہیں اس کا تعین میڈیکل پینل کرے گا۔
خیال رہے کہ صائم ایوب جنوبی افریقہ کے خلاف کیپ ٹاؤن ٹیسٹ کے دوران انجری کا شکار ہوئے تھے اور انہیں پی سی بی چیئرمین کی ہدایت پر علاج کے لیے لندن بھیجا گیا تھا۔
