پاکستان سپر لیگ (پی ایس ایل) 11 کے فائنل کے لیے شائقینِ کرکٹ کو اسٹیڈیم آنے کی اجازت دے دی گئی ہے پی سی بی کے چیئرمین محسن نقوی نے سوشل میڈیا پلیٹ فارم ایکس پر اعلان کرتے ہوئے بتایا کہ انہوں نے اس حوالے سے وزیراعظم شہباز شریف سے درخواست کی تھی۔
چیئرمین پی سی بی کے مطابق وزیراعظم اصولی طور پر شائقین کو اجازت دینے کے حق میں تھے، تاہم ملک میں جاری کفایت شعاری مہم اور ایندھن کے کم استعمال کے اقدامات کے باعث اس فیصلے پر غور کیا گیا۔
بعد ازاں فرنچائز مالکان کی درخواست پر وزیراعظم نے خصوصی طور پر پی ایس ایل 11 کے فائنل میں تماشائیوں کی شرکت کی منظوری دے دی۔
محسن نقوی نے اس فیصلے پر وزیراعظم کا شکریہ ادا کرتے ہوئے کہا کہ اس سے کرکٹ شائقین کو بھرپور تفریح کا موقع ملے گا۔
واضح رہے کہ پی ایس ایل 11 کا فائنل 3 مئی کو قذافی اسٹیڈیم میں کھیلا جائے گا۔
