اردو انٹرنیشنل اسپورٹس ویب ڈیسک تفصیلات کے مطابق اتحاد اسٹیڈیم میں پریمیئر لیگ کی دو ٹاپ ٹیموں مانچسٹر سٹی اور آرسنل کے درمیان کانٹے دار مقابلہ دیکھنے میں آیا جہاں مانچسٹر سٹی نے ہوم اسٹیڈیم میں مضبوط آغاز کیا اور کھیل کے پہلے نو منٹ کے بعد ہی ایرلنگ ہالینڈ نے گول کرکے سٹی کو کھیل میں 1-0 کی برتری دلا دی ۔ یہ ہالینڈ کا سٹی کے لیے کیریئر کا 100 واں گول تھا۔
تاہم کھیل کے 22ویں منٹ میں ہی سٹی کو بڑا دھچکا اس وقت لگا جب ان کے اہم کھلاڑی اور مڈفیلڈر روڈری کو انجری کے باعث کھیل چھوڑنا پڑا اور سٹی نے 10 کھلاڑیوں کے ساتھ باقی میچ کھیلا ۔
دوسری جانب آرسنل نے زبردست دفاع کا مظاہرہ کیا تھا اور ایرلنگ ہالینڈ کے ابتدائی گول کے بعد کھیل کا رخ موڑ دیا، آرسنل نے ریکارڈو کیلافیوری کے ذریعے جلد ہی گول کر کے برابری کردی۔
اس کے بعد آرسنل نے ایک بار پھر سیٹ پیسز میں اپنی مہارت دکھائی جب ہاف ٹائم سے پہلے گیبریل نے ہیڈر کے ذریعے گول کیا، اس کے فوراً بعد کھیل میں متنازعہ صورت حال پیدا ہوگئی جب آرسنل کے ٹروسارڈ کو گیند کو کک کرنے پر دوسرا پیلا کارڈ دیا گیا۔ یہ چیز آرسنل کے لیے مایوس کن تھی، کیونکہ سٹی کے جیریمی ڈوکو کو ایسی ہی ایک حرکت پر پیلا کارڈ نہیں دیا گیا تھا۔
پہلے ہاف میں لینڈرو ٹروسارڈ کو باہر بھیجے جانے کے بعد آرسنل 10 کھلاڑیوں کے ساتھ کھیلنے کے باوجود جیت کے قریب تھا۔ لیکن کھیل کے آخری منٹوں میں جان سٹونز نے مانچسٹر سٹی کے لیے اتحاد اسٹیڈیم میں ڈرامائی میچ میں آرسنل کے خلاف ڈرا کو یقینی بنایا۔
