ڈونلڈ ٹرمپ کے نامزد کردہ پیٹ ہیگستھ کو امریکی سینیٹ نے وزیر دفاع مقرر کر دیا، لیکن یہ فیصلہ آسان نہیں تھا کیونکہ ہیگستھ کو نامزدگی کے دوران کئی تنازعات کا سامنا کرنا پڑا۔ ان پر 2017 میں ایک ہوٹل کے کمرے میں جنسی زیادتی، شراب نوشی، اور اپنی سابقہ شادیوں میں بے وفائی کے الزامات لگائے گئے تھے، جنہیں انہوں نے سختی سے مسترد کر دیا۔
تین ریپبلکن سینیٹرز، جن میں سابق سینیٹ اکثریتی رہنما مچ میک کونل بھی شامل تھے، ان کے خلاف ووٹ دے چکے تھے اور ان بطور وزیر دفاع تعیناتی غیر یقینی صورت حال کا شکار تھی، جب نائب صدر جے ڈی وینس نے ٹائی بریکنگ ووٹ ڈال کر 50-50 کی برابری ختم کی اور ہیگستھ کی بطور وزیر دفاع تعیناتی کو یقینی بنایا۔
ریپبلکن سینیٹر مچ میک کونل نے ہیگستھ کی مخالفت کی اور کہا وہ 30 لاکھ افراد کے محکمے اور 849 بلین ڈالر کے بجٹ کو سنبھالنے کے اہل نہیں ہیں۔ میک کونل نے کہا، “وزیر دفاع کا عہدہ امریکی عوام کی سلامتی کے لیے روزانہ کی بنیادوں پر ایک امتحان ہے، اور ہیگستھ ابھی تک یہ ثابت کرنے میں ناکام رہے ہیں کہ وہ اس امتحان میں کامیاب ہوں گے۔”
ریپبلکن سینیٹر راجر ویکر اور دیگر نے پیٹ ہیگستھ کی حمایت کی اور ان کے حق میں ووٹ دیا۔ ویکر نے کہا کہ ہیگستھ “محکمہ دفاع میں اصلاحات لائیں گے اور صدر ٹرمپ کے منصوبوں کو آگے بڑھائیں گے۔”
دوسری طرف، ڈیموکریٹس نے سوال اٹھایا کہ کیا ہیگستھ کے پاس اتنے بڑے محکمے کی قیادت کرنے کے لیے درکا تجربہ موجود ہے۔ خاص طور پر خواتین سینیٹرز نے ان سے ان کے پرانے بیانات کے بارے میں سوال کیا، جن میں انہوں نے کہا تھا کہ خواتین کو جنگی کردار ادا نہیں کرنا چاہیے۔ ہیگستھ نے وضاحت کی کہ ان کا مقصد خواتین کو روکنا نہیں بلکہ فوج کے معیار کو برقرار رکھنا ہے۔
ریپبلکن سینیٹر لیزا مرکوسکی اور سوسن کولنز نے بھی ہیگستھ کے خلاف ووٹ دیا۔
واضح رہے، پیٹ ہیگستھ سابق جنگی تجربہ کار ہیں اور وہ عراق، افغانستان اور گوانتانا مو بے میں ایک انفنٹری افسر کے طور پر خدمات سر انجام دے چکے ہیں اس کے علاوہ وہ فاکس نیوز میں ایک دہائی تک ایک پروگرام ‘فاکس اینڈ فرینڈز ویک اینڈ’ کی میزبانی بھی کرچکے ہیں۔ صرف یہی نہیں ہیگستھ کئی کتابوں کے مصنف بھی ہیں جن میں ‘ دی وار آن واریئرز’ بھی شامل ہے۔
بطور وزیر دفاع، وہ تقریباً 30 لاکھ ملازمین اور 849 بلین ڈالر کے بجٹ کی نگرانی کریں گے۔ ان کی بطور وزیر دفاع تعیناتی ایک ایسے وقت میں ہوئی ہے جب امریکی دفاعی پالیسی اور قیادت میں استحکام کی ضرورت پہلے سے کہیں زیادہ محسوس کی جا رہی ہے۔
