Peshawar Zalmi became PSL champions for the second time-X
پاکستان سپر لیگ 11 فائنل میں پشاور زلمی نے شاندار کارکردگی کا مظاہرہ کرتے ہوئے حیدرآباد کنگزمین کو 5 وکٹوں سے شکست دے کر دوسری مرتبہ ٹائٹل اپنے نام کرلیا، اور 9 سال بعد چیمپئن بننے کا اعزاز حاصل کیا۔
لاہور کے قذافی اسٹیڈیم میں کھیلے گئے فائنل میں زلمی نے 130 رنز کا ہدف 16.2 اوورز میں 5 وکٹوں کے نقصان پر حاصل کیا ابتدائی وکٹیں جلد گرنے کے باوجود ایرون ہارڈی (56 ناٹ آؤٹ) اور عبدالصمد (48) نے 85 رنز کی فیصلہ کن شراکت قائم کر کے ٹیم کو فتح دلائی۔
اس سے قبل حیدرآباد کنگزمین کی ٹیم 18 اوورز میں 129 رنز پر ڈھیر ہوگئی، صائم ایوب 54 رنز کے ساتھ نمایاں رہے جبکہ ایرون ہارڈی نے 4 وکٹیں حاصل کر کے میچ کا پانسہ پلٹ دیا۔
فائنل میں آل راؤنڈ کارکردگی پر ایرون ہارڈی کو پلیئر آف دی فائنل قرار دیا گیا، جبکہ سفیان مقیم ٹورنامنٹ کے بہترین کھلاڑی ٹھہرے بابر اعظم 588 رنز کے ساتھ بہترین بیٹر اور سفیان مقیم 22 وکٹوں کے ساتھ بہترین بولر رہے۔
دیگر اعزازات میں شاداب خان بہترین آل راؤنڈر، کوشل مینڈس بہترین وکٹ کیپر اور حنین شاہ ایمرجنگ پلیئر آف دی ٹورنامنٹ قرار پائے۔
