پاکستان اسپورٹس بورڈ نے کھیلوں کی فیڈریشنز کے لیے نیا ضابطہ اخلاق نافذ کردیا

اردو انٹرنیشنل (اسپورٹس ویب ڈیسک) تفصیلات کے مطابق پاکستان اسپورٹس بورڈ (پی ایس بی) نے کھیلوں کی فیڈریشنز کے لیے نیا ضابطہ اخلاق نافذ کیا ہے، جو اولمپک چارٹر کے مطابق بنایا گیا ہے۔ وزیراعظم کے مشیر برائے بین الصوبائی رابطہ اور پاکستان سپورٹس بورڈ کے صدر رانا ثنا اللہ کی زیر صدارت 31 ویں بورڈ اجلاس میں کئی اہم اصلاحات کی منظوری دی گئی جن میں فیڈریشنز کے انتخابات کی نگرانی کے لیے الیکشن کمیشن کا قیام، تنازعات کے حل کے لیے خصوصی ٹربیونل کا قیام ، گورننس فریم ورک کو عالمی اولمپک کمیٹی (آئی او سی) کے چارٹر کے مطابق بنانے کی تجویز اور بین الاقوامی میڈل جیتنے والوں کے لیے نقد انعامات میں اضافہ شامل ہے۔

نقد انعام کی رقم کو بڑھا کر 1 کروڑ روپے کر دیا گیا اور چیمپئن کھلاڑیوں کے لیے گولڈ کارڈ متعارف کرایا گیا ہے جس کے ذریعے وہ پاکستان اسپورٹس بورڈ کی سہولتوں تک رسائی حاصل کر سکیں گے اور انہیں مزید مدد اور وسائل فراہم کیے جائیں گے۔

وزیراعظم کے مشیر رانا ثنا اللہ کی سربراہی میں اجلاس میں یہ اقدامات گورننس میں شفافیت اور کھیلوں کی ترقی کو فروغ دیں گے۔

اجلاس میں آئی او سی چارٹر کے گڈ گورننس کے اصولوں کے مطابق اصلاحات کی منظوری دی گئی، جو برطانیہ، آسٹریلیا اور سوئٹزرلینڈ جیسے ممالک میں پہلے ہی اپنائے گئے عالمی بہترین طریقوں کی عکاسی کرتے ہیں۔

اجلاس میں منظور ہونے والے اہم فیصلوں میں پاکستان کوڈ آف ایتھکس اینڈ گورننس ان اسپورٹس (PCEGS) کا نفاذ بھی شامل ہے، یہ فریم ورک کھیلوں کی فیڈریشنز کے انتظام میں شفافیت اور دیانتداری کو یقینی بناتا ہے، اس میں بدعنوانی، ڈوپنگ، اور اقربا پروری جیسے مسائل کے خاتمے کے لیے واضح فریم ورک فراہم کیا گیا ہے جو قومی قوانین اور بین الاقوامی معیارات کے مطابق ہے۔

اجلاس میں ماڈل دستور العمل کی منظوری دی گئی جس میں تمام کھیلوں کی فیڈریشنز کو اپنے گورننس فریم ورک کو آئی او سی چارٹر اور اپنے متعلقہ بین الاقوامی فیڈریشنز کے گورننس ڈھانچے کے مطابق بنانے کی ہدایت کی گئی ہے۔ اس اقدام سے ملک بھر کی فیڈریشنز میں شفافیت اور خودمختاری کو فروغ ملے گا۔