آئی سی سی کی نئی رینکنگ جاری، پاکستانی کھلاڑیوں کی ترقی

انٹرنیشنل کرکٹ کونسل (آئی سی سی) نے تازہ ترین پلیئر رینکنگ جاری کر دی ہے، جس میں کئی پاکستانی کھلاڑیوں کی پوزیشن میں بہتری ریکارڈ کی گئی ہے۔

ٹیسٹ بیٹرز میں انگلینڈ کے جو روٹ پہلے، نیوزی لینڈ کے کین ولیم سن دوسرے، آسٹریلیا کے اسٹیو اسمتھ تیسرے اور ہیری بروک چوتھے نمبر پر ہیں پاکستان کے سعود شکیل ایک درجہ ترقی کے ساتھ ٹاپ 10 میں شامل ہو گئے، جبکہ نیوزی لینڈ کے راچن رویندرا نو درجے بہتری کے بعد 15ویں پوزیشن پر آگئے۔

ٹیسٹ بولرز میں بھارت کے جسپریت بمرا سرفہرست ہیں، میٹ ہنری دوسرے، مچل اسٹارک تیسرے اور پاکستان کے نعمان علی چوتھے نمبر پر موجود ہیں آل راؤنڈرز میں بھارت کے رویندرا جدیجا بدستور پہلے نمبر پر ہیں۔

ون ڈے بیٹرز میں بھارت کے روہت شرما نے پہلی پوزیشن برقرار رکھی ہے، ویرات کوہلی دوسرے، ڈیرل مچل تیسرے اور افغانستان کے ابراہیم زدران چوتھے نمبر پر ہیں۔

بابر اعظم چھٹے نمبر پر موجود ہیں بولنگ میں افغانستان کے راشد خان پہلے، جوفرا آرچر دوسرے اور کلدیپ یادیو تیسرے نمبر پر ہیں پاکستان کے شاہین آفریدی دو درجے بہتری کے بعد 19ویں جبکہ حارث رؤف ایک درجہ ترقی کے ساتھ 22ویں نمبر پر آگئے ہیں۔

ٹی 20 بیٹرز رینکنگ میں پاکستان کے صاحبزادہ فرحان ایک درجہ بہتری سے پانچویں نمبر پر پہنچ گئے، جبکہ بولنگ میں ابرار احمد چوتھی پوزیشن پر برقرار ہیں ٹی 20 آل راؤنڈرز میں صائم ایوب بدستور نمبر ون ہیں۔