محسن نقوی کا قومی ہاکی ٹیم کے بے روزگار کھلاڑیوں کو ملازمتیں دینے کا اعلان

لاہور: چیئرمین پاکستان کرکٹ بورڈ (پی سی بی) محسن نقوی نے قومی ہاکی ٹیم کے بے روزگار کھلاڑیوں کو ملازمتیں دینے اور زخمی کھلاڑیوں کے علاج کی سہولت فراہم کرنے کا اعلان کر دیا۔

یہ اعلان قذافی اسٹیڈیم لاہور میں قومی ہاکی ٹیم کے کپتان عماد بٹ کی قیادت میں کھلاڑیوں اور ہیڈ کوچ خواجہ جنید سے ملاقات کے دوران کیا گیا اس موقع پر محسن نقوی نے ٹیم کو آٹھ سال بعد ہاکی ورلڈ کپ کے لیے کوالیفائی کرنے پر مبارکباد بھی دی۔

چیئرمین پی سی بی کا کہنا تھا کہ زخمی ہاکی پلیئرز کے علاج کے اخراجات پاکستان کرکٹ بورڈ برداشت کرے گا اور ہاکی کھلاڑیوں کے ساتھ پہلے کی طرح تعاون جاری رکھا جائے گا۔ انہوں نے ورلڈ کپ کے لیے قومی ٹیم کے لیے نیک خواہشات کا بھی اظہار کیا۔

ملاقات کے بعد میڈیا سے گفتگو کرتے ہوئے ہیڈ کوچ خواجہ جنید اور کپتان عماد بٹ نے چیئرمین پی سی بی کی جانب سے بھرپور حمایت پر شکریہ ادا کیا اور کہا کہ اس اقدام سے کھلاڑیوں کے حوصلے بلند ہوئے ہیں۔