اردو انٹرنیشنل اسپورٹس ویب ڈیسک تفصیلات کے مطابق مکسڈ مارشل آرٹس ایشین چیمپئن شپ کے دلچسپ مقابلے پاکستان کے شہر لاہور میں جاری ہیں جہاں سیمی فائنل میں ویمن ایٹم ویٹ کی 47.6 کلوگرام کیٹگری میں بھارت کی خوشبو نشاد کو پاکستانی فائٹر بانو بٹ نے شکست دی ۔ بانو بٹ نے تیسرے راونڈ میں بھارتی حریف خوشبو کو چت کیا۔
سیمی فائنل میں جیتنے والی پاکستانی خاتون فائٹر بانو بٹ نے میڈیا سے گفتگو کے دوران کہا کہ “سیمی فائنل کے لئے بہت محنت کی تھی ،میری کیٹگری جونئیر کی تھی مجھے کوچ نے پوچھا کہ سینئیر کھیل سکتی ہو؟ میں نے انکو کہا کھیل لونگی خود کو ٹیسٹ کرنا چاہتی ہوں،بھارتی حریف میری بڑی بہن کی طرح ہیں ، لیکن رنگ میں کوئی دوست نہیں ہوتا ۔ آج لڑائی مشکل تھی سینئیر جونئیر کا فرق آجاتا ہے جس طرح چاہ رہی تھی اس طرح اچھی پرفارمنس نہیں آئی ۔ کل فائنل میں پاکستان کے لئے گولڈ میڈل جیتوں گی”۔
جبکہ سیمی فائنل میں شکست سے دوچار ہونے والی بھارتی فائٹر خوشبو نشاط نے کہا کہ ” پاکستان کی میزبانی بہت اچھی ہے ، یہاں کے لوگ بہت اچھے ہیں جیسے ہم نے سنا تھا ویسا بلکل نہیں ہے ۔ یہاں کے لوگ بہت خوش مزاج اور بہت مددگار ہیں ،بھارت میں پاکستان سے متعلق غلط باتیں ہوتی ہیں کہ پاکستان بہت خطرناک ملک ہے ۔ جب یہاں آکر دیکھا تو میری سب غلط فہمیاں دور ہوگئیں ، جیسے بھارت میں محفوظ محسوس کررہی تھی ویسے ہی یہاں پر محسوس کررہی ہوں ۔ جیسے سنا تھا لڑکیوں کو کافی دبا کر رکھا جاتا ہے لڑکیاں حجاب میں رہتی ہیں ویسا نہیں لڑکیاں یہاں محفوظ رہتی ہیں ۔ پاکستان بہت اچھا ملک ہے “۔
