کیا سیمی فائنل کی دوڑ میں پاکستان کیلئے اب بھی راستہ باقی ہے؟

ٹی ٹوئنٹی ورلڈ کپ کے سپر 8 مرحلے میں نیوزی لینڈ کی سری لنکا  کے خلاف 61 رنز سے بڑی فتح نے گروپ 2 کی صورتحال یکسر بدل دی اور پاکستان کی سیمی فائنل تک رسائی مزید مشکل بنا دی ہے۔

نیوزی لینڈ نے اس کامیابی کے ساتھ سری لنکا کو ایونٹ سے باہر کر دیا جبکہ اپنے رن ریٹ کو بہتر کرتے ہوئے 3.050 تک پہنچا دیا، جو گروپ میں سب سے زیادہ ہے۔

کیویز ایک فتح کے ساتھ 3 پوائنٹس لے کر دوسرے نمبر پر ہیں انگلینڈ دو فتوحات اور 1.494 رن ریٹ کے ساتھ سرفہرست ہے، جبکہ پاکستان ایک کامیابی اور منفی 0.461 رن ریٹ کے ساتھ تیسرے نمبر پر موجود ہے۔

گرین شرٹس کی نظریں اب نیوزی لینڈ اور انگلینڈ کے آئندہ میچ پر جمی ہیں اگر انگلینڈ کم از کم 20 رنز کے مارجن سے کامیاب ہوتا ہے تو پاکستان کی امید برقرار رہے گی، تاہم اس صورت میں بھی قومی ٹیم کو اپنے آخری میچ میں سری لنکا کو تقریباً 50 رنز سے شکست دینا ہوگی تاکہ بہتر رن ریٹ کی بنیاد پر سیمی فائنل تک رسائی ممکن ہو سکے۔

بصورت دیگر اگر نیوزی لینڈ کامیاب رہا تو پاکستان کا ایونٹ میں سفر اختتام پذیر ہو جائے گا اور سری لنکا کے خلاف آخری میچ رسمی کارروائی بن کر رہ جائے گا۔