افغانستان کے سابق کرکٹر شاپور زدران تشویشناک حالت میں ہسپتال داخل، شاہد آفریدی کی مد د کی پیشکش

پاکستان کرکٹ ٹیم کے سابق کپتان شاہد آفریدی نے سابق افغان فاسٹ بولر شاپور زدران کی تشویشناک طبی حالت پر گہری تشویش کا اظہار کرتے ہوئے ہر ممکن مدد کی پیشکش کی ہے۔

رپورٹس کے مطابق 38 سالہ سابق افغان کرکٹر کو سنگین طبی پیچیدگی کے باعث ہسپتال کے انتہائی نگہداشت وارڈ میں داخل کیا گیا ہے، جبکہ اہلِ خانہ نے سوشل میڈیا کے ذریعے ان کی صحت سے متعلق اپڈیٹس شیئر کرتے ہوئے مداحوں سے دعاؤں کی اپیل کی ہے۔

سماجی رابطے کی ویب سائٹ ایکس پر اپنے بیان میں شاہد آفریدی کا کہنا تھا کہ شاپور زدران کے بھائی سے گفتگو کے بعد ان کی حالت کے بارے میں سن کر بے حد افسوس ہوا انہوں نے زدران کے حوصلے کو سراہتے ہوئے کہا کہ وہ میدان میں ہمیشہ ایک فائٹر رہے ہیں اور اس مشکل وقت میں بھی ثابت قدم رہیں گے۔

آفریدی نے اپنے پیغام میں مزید کہا کہ وہ شاپور زدران کی جلد صحتیابی کے لیے دعاگو ہیں اور پاکستان ان کے ساتھ کھڑا ہے، جبکہ کسی بھی قسم کی مدد کے لیے وہ ہر وقت دستیاب ہیں۔

واضح رہے کہ شاپور زدران نے افغانستان کی جانب سے 44 ون ڈے میچز میں 43 وکٹیں حاصل کیں جبکہ 36 ٹی ٹوئنٹی میچز میں 37 وکٹیں اپنے نام کیں۔