Babar Azam's record-breaking century helps Peshawar Zalmi defeat Quetta by 118 runs-PSL
پاکستان سپر لیگ کے سیزن 11 کے 29ویں میچ میں پشاور زلمی نے شاندار کارکردگی کا مظاہرہ کرتے ہوئے کوئٹہ گلیڈی ایٹرز کو یکطرفہ مقابلے کے بعد 118 رنز سے شکست دے دی۔
کراچی کے نیشنل اسٹیڈیم میں کھیلے گئے اس میچ میں زلمی نے پہلے بیٹنگ کرتے ہوئے 255 رنز کا بڑا مجموعہ اسکور کیا، جس کے جواب میں گلیڈی ایٹرز کی پوری ٹیم 137 رنز پر ڈھیر ہو گئی۔
کوئٹہ گلیڈی ایٹرز کے کپتان سعود شکیل نے ٹاس جیت کر پہلے فیلڈنگ کا فیصلہ کیا، تاہم یہ فیصلہ ان کے حق میں ثابت نہ ہو سکا۔ پشاور زلمی کی جانب سے کپتان بابر اعظم نے شاندار سنچری اسکور کرتے ہوئے 52 گیندوں پر 100 رنز بنائے اور ناٹ آؤٹ رہے۔
انہوں نے اپنی اننگز میں 6 چوکے اور 4 چھکے لگائے اور ٹیم کو مضبوط پوزیشن فراہم کی بابر اعظم کو ان کی عمدہ کارکردگی پر پلیئر آف دی میچ قرار دیا گیا۔
بابر اعظم کا بھرپور ساتھ کوسل مینڈس نے دیا، جنہوں نے جارحانہ انداز میں 44 گیندوں پر 83 رنز اسکور کیے ان کی اننگز میں 10 چوکے اور 3 چھکے شامل تھے آخر میں ارون ہارڈی نے بھی تیز رفتار 26 رنز بنا کر ٹیم کے مجموعے کو 255 تک پہنچانے میں اہم کردار ادا کیا۔
ہدف کے تعاقب میں کوئٹہ گلیڈی ایٹرز کا آغاز انتہائی مایوس کن رہا اور ابتدائی وکٹیں جلد گرنے سے ٹیم دباؤ کا شکار ہو گئی کپتان سعود شکیل 12 رنز بنا کر آؤٹ ہوئے جبکہ دیگر بیٹرز بھی خاطر خواہ کارکردگی نہ دکھا سکے بووین جیکب 34 رنز کے ساتھ نمایاں رہے، تاہم ٹیم کو شکست سے نہ بچا سکے۔
پشاور زلمی کی جانب سے باسط علی اور علی رضا نے تین، تین وکٹیں حاصل کیں جبکہ ارون ہارڈی نے دو کھلاڑیوں کو آؤٹ کیا۔ اس فتح کے ساتھ پشاور زلمی نے سیزن میں اپنی ساتویں کامیابی حاصل کر لی ہے اور ٹیم کی کارکردگی مسلسل مضبوط نظر آ رہی ہے۔
