ابھیشیک شرما اسپتال سے ڈسچارج، نمیبیا کے خلاف شرکت کا فیصلہ آج ہوگا

بھارت کے اوپنر ابھیشیک شرما کو معدے کے انفیکشن اور بخار کے باعث اسپتال منتقل کیے جانے کے بعد ڈسچارج کردیا گیا ہے، تاہم آئی سی سی  ٹی20 ورلڈ کپ 2026 میں نمیبیا کے خلاف میچ میں ان کی شرکت کا حتمی فیصلہ میچ سے قبل کیا جائے گا۔

نئی دہلی پہنچنے پر طبیعت ناساز ہونے کے باعث ابھیشیک شرما کے مختلف طبی معائنے کیے گئے، جن کی رپورٹس تسلی بخش رہیں بھارتی کھلاڑی تلک ورما نے میڈیا سے گفتگو میں بتایا کہ ابھیشیک کی حالت بہتر ہے اور ٹیم میچ سے قبل ان کی فٹنس کا جائزہ لے کر حتمی فیصلہ کرے گی۔

دوسری جانب فاسٹ بولر جسپریت بمراہ بھی بیماری سے صحتیاب ہوکر فٹ قرار دے دیے گئے ہیں اور انہوں نے ٹیم کے ساتھ پریکٹس بھی کی۔

واضح رہے کہ دفاعی چیمپئن بھارت گروپ اے میں پاکستان، امریکا، نمیبیا اور نیدرلینڈز کے ساتھ شامل ہے بھارت نے اپنے پہلے میچ میں امریکا کو 29 رنز سے شکست دے کر ایونٹ کا فاتحانہ آغاز کیا تھا۔