19-year-old Ryan Habib makes history by completing the Ironman challenge-X
کراچی سے تعلق رکھنے والے 19 سالہ ایتھلیٹ رایان حبیب نے عالمی سطح کے مشکل ترین مقابلوں میں شمار ہونے والے آئرن مین چیلنج کو کامیابی سے مکمل کر کے نئی تاریخ رقم کر دی وہ یہ اعزاز حاصل کرنے والے کم عمر ترین پاکستانی بن گئے ہیں۔
امریکا کی ریاست ٹیکساس کے شہر ووڈ لینڈز میں منعقدہ ایونٹ میں رایان حبیب نے مجموعی طور پر 15 گھنٹے، 20 منٹ اور 6 سیکنڈز میں چیلنج مکمل کیا۔
انہوں نے 3.8 کلومیٹر اوپن واٹر سوئمنگ 1 گھنٹہ 45 منٹ 36 سیکنڈز میں، 180 کلومیٹر سائیکلنگ 7 گھنٹے 27 منٹ 49 سیکنڈز میں جبکہ 42.2 کلومیٹر میراتھون 5 گھنٹے 38 منٹ 57 سیکنڈز میں مکمل کی۔
آئرن مین چیلنج کو دنیا کے سخت ترین انڈیورنس مقابلوں میں شمار کیا جاتا ہے، جس میں ایتھلیٹس کو تیراکی، سائیکلنگ اور دوڑ کے تینوں مراحل بغیر کسی وقفے کے مکمل کرنا ہوتے ہیں۔
فنش لائن عبور کرنے کے بعد رایان حبیب نے پاکستان کا پرچم لہرا کر اپنی کامیابی کا جشن منایا اور ملک کا نام عالمی سطح پر روشن کیا۔
