ایشین کپ کوالیفائر: پاکستان، میانمار میچ بغیر شائقین کے ہوگا

اسلام آباد: پاکستان فٹ بال فیڈریشن نے اعلان کیا ہے کہ 31 مارچ کو اے ایف سی ایشین کپ کوالیفائرز 2026 کے تحت پاکستان اور میانمار کے درمیان میچ بند دروازوں کے پیچھے کھیلا جائے گا۔

فیڈریشن کے مطابق یہ فیصلہ وفاقی حکومت کی اس پالیسی کے تحت کیا گیا ہے جس میں ایندھن کے تحفظ اور کفایت شعاری اقدامات کے باعث 200 سے زائد افراد کے اجتماعات پر پابندی عائد ہے یہ میچ اسلام آباد کے جناح اسپورٹس اسٹیڈیم میں شیڈول ہے۔

پی ایف ایف نے واضح کیا کہ تمام ٹکٹ ہولڈرز کو ان کی رقم خودکار طور پر اسی ادائیگی کے طریقے کے ذریعے واپس کر دی جائے گی جس سے ٹکٹ خریدے گئے تھے فیڈریشن نے شائقین کی غیر معمولی دلچسپی کو سراہتے ہوئے کہا کہ مستقبل میں انہیں دوبارہ اسٹیڈیم میں خوش آمدید کہا جائے گا۔

واضح رہے کہ پاکستان ٹیم پہلے ہی ٹورنامنٹ کے لیے کوالیفائی کرنے کی دوڑ سے باہر ہو چکی ہے اور گروپ ای میں پانچ میچوں میں صرف دو پوائنٹس کے ساتھ آخری پوزیشن پر ہے۔ قومی ٹیم کو سعودی عرب اور شام کے خلاف شکستوں کا سامنا کرنا پڑا جبکہ افغانستان کے خلاف دونوں میچ برابر رہے۔

میانمار کے خلاف پہلے مقابلے میں بھی پاکستان کو 1-0 سے شکست ہوئی تھی۔