توانائی بچاؤ اقدامات: بنگلہ دیش کی یونیورسٹیوں کی چھٹیاں قبل از وقت کرنے کا فیصلہ۔

اردو انٹرنیشنل (مانیٹرنگ ڈیسک) رائٹرز کی خبر کے مطابق بنگلہ دیش نے بڑھتے ہوئے توانائی بحران کے پیشِ نظر ملک بھر کی تمام سرکاری اور نجی جامعات کو پیر سے بند کرنے کا اعلان کر دیا ہے، جس کے ساتھ عید الفطر کی تعطیلات بھی قبل از وقت شروع کر دی گئی ہیں۔ حکام کا کہنا ہے کہ یہ اقدام بجلی اور ایندھن کی کھپت کم کرنے کے لیے کیا گیا ہے۔

حکام کے مطابق یونیورسٹی کیمپس میں رہائشی ہالز، کلاس رومز، لیبارٹریز اور ایئر کنڈیشننگ کی وجہ سے بجلی کی کھپت بہت زیادہ ہوتی ہے، اور جامعات کی بندش سے نہ صرف بجلی کی بچت ہوگی بلکہ ٹریفک میں کمی سے ایندھن کی بھی بچت ممکن ہوگی۔

بنگلہ دیش میں سرکاری اور نجی اسکول پہلے ہی رمضان کے دوران بند ہیں، اور اس فیصلے کے بعد ملک کے زیادہ تر تعلیمی ادارے اس عرصے میں بند رہیں گے۔

توانائی بحران کے باعث حکومت نے جمعہ کے روز پیٹرول اور دیگر ایندھن کی روزانہ کی حد بھی مقرر کر دی تھی تاکہ ذخیرہ اندوزی سے بچا جا سکے۔ علاوہ ازیں، غیر ملکی نصاب والے اسکول اور نجی کوچنگ سینٹرز بھی اس دوران بند رہیں گے تاکہ بجلی کا استعمال کم کیا جا سکے۔

شدید گیس کی کمی کے سبب بنگلہ دیش نے چار میں سے پانچ سرکاری کھاد کارخانوں کی پیداوار عارضی طور پر بند کر دی ہے اور دستیاب گیس کو بجلی گھروں کو فراہم کیا جا رہا ہے تاکہ بڑے پیمانے پر بجلی کی بندش سے بچا جا سکے۔

توانائی کے سینئر حکام کا کہنا ہے کہ حکومت توانائی کی بچت اور بجلی، ایندھن و درآمدات کی مستحکم فراہمی کے لیے ہر ممکن اقدامات کر رہی ہے۔