اردوانٹرنیشنل (اسپورٹس ڈیسک) تفصیلات کے مطابق بھارتی کرکٹ ٹیم کے کپتان روہت شرما کے اگلے ماہ آئی سی سی چیمپئنز ٹرافی 2025 سے قبل مبینہ طور پر پاکستان کا دورہ متوقع ہے۔
پیر کو بھارتی میڈیا کی رپورٹس کے مطابق یہ دورہ ایک تاریخی لمحہ ہوگا، کیونکہ ایک بھارتی کرکٹر کو بین الاقوامی ایونٹ کے لیے پاکستان آئے ہوئے کئی برس بیت چکے ہیں۔
ایونٹ میں تمام کپتانوں کا فوٹو شوٹ اور ایک پریس کانفرنس شامل ہوگی جہاں کپتان ٹورنامنٹ کے لیے اپنی توقعات کا اظہار کریں گے۔
چیمپئنز ٹرافی 2025 کے لیے، تمام آٹھ شریک کپتانوں کو آئی سی سی کے زیر اہتمام اس ایونٹ میں حصہ لینا ہے۔
تاہم، بورڈ آف کنٹرول فار کرکٹ ان انڈیا (بی سی سی آئی) نے ابھی تک شرما کے دورہ پاکستان کے حوالے سے کوئی سرکاری بیان جاری نہیں کیا ہے مزید یہ کہ ہندوستانی ٹیم نے ابھی تک ٹورنامنٹ کے لیے اپنی ٹیم کا اعلان نہیں کیا ہے۔
ٹیم انڈیا اس وقت انگلینڈ کے خلاف اپنی آنے والی وائٹ بال سیریز کی تیاری کر رہی ہے روہت شرما کی قیادت والی ٹیم چیمپئنز ٹرافی سے قبل انگلینڈ کے خلاف تین ون ڈے میچ کھیلنے والی ہے۔
آٹھ ٹیموں پر مشتمل یہ ٹورنامنٹ 19 فروری سے 9 مارچ تک پاکستان کے تین مقامات کراچی، لاہور اور راولپنڈی اور دبئی میں کھیلا جائے گا۔
