پی سی بی آئی سی سی کے سالانہ اجلاس میں چیمپئنز ٹرافی کا بجٹ پیش کرے گا
اردو انٹرنیشنل (اسپورٹس ڈیسک )تفصیلات کے مطابق پاکستان کرکٹ بورڈ (پی سی بی) چیمپئنز ٹرافی 2025 کا بجٹ انٹرنیشنل کرکٹ کونسل (آئی سی سی) کے سالانہ اجلاس میں پیش کرے گا جو 22 جولائی کو کولمبو میں ہوگا۔
یہ بجٹ آئی سی سی کے چیف فنانس آفیسر انکور کھنہ اور پی سی بی کے چیف فنانس آفیسر جاوید مرتضیٰ نے تیار کیا تھا جو کولمبو میں آئی سی سی کے سالانہ اجلاس میں مرکزی توجہ ہوگا۔
پی سی بی کے چیئرمین محسن نقوی اور سی ای او سلمان نصیر آئی سی سی کے سالانہ اجلاس میں پاکستان کی نمائندگی کریں گے جہاں بجٹ کی منظوری دی جائے گی۔
غیر جانبدار مقام یا پلان بی کی افواہوں کے باوجود پی سی بی چیمپئنز ٹرافی 2025 کے تمام میچز کی میزبانی ملک میں کرانے کے اپنے موقف پر قائم ہے۔
پاکستان 2025 کی چیمپئنز ٹرافی کی میزبانی کرنے کے لیے تیار ہے اور حال ہی میں خبروں میں ’پلان بی‘ اور ’نیوٹرل وینیو‘ کی افواہیں سامنے آنا شروع ہوئیں، جس میں یہ خبریں سامنے آئیں کہ بھارتی کرکٹ ٹیم پاکستان کا دورہ نہیں کرے گی اور اپنے میچ نہیں کھیلے گی۔
تاہم پی سی بی کا پختہ خیال ہے کہ چونکہ ایونٹ پاکستان کا ہے اس لیے اسے مکمل طور پر پاکستان میں ہی ہونا چاہیے انٹرنیشنل کرکٹ کونسل (آئی سی سی) کا سالانہ اجلاس 19 سے 22 جولائی تک کولمبو میں شیڈول ہے اور پی سی بی کا وفد ملک میں تمام میچوں کی میزبانی کے مضبوط موقف کے ساتھ وہاں جائے گا۔
تین مقامات کراچی، راولپنڈی اور لاہور آٹھ میچوں کے میچز کی میزبانی کریں گے اور پی سی بی کے آئی سی سی کو مجوزہ شیڈول کے مطابق بھارت کے تمام میچ لاہور میں ہوں گے۔
چیمپئنز ٹرافی کی مجوزہ تاریخیں 19 فروری سے 9 مارچ تک ہیں۔
