وزیراعظم اور سعودی ولی عہد کا وسیع البنیاد تعاون کو مضبوط بنانے پر اتفاق
اردو انٹرنیشنل (مانیٹرنگ ڈیسک) وزیر اعظم شہباز شریف اور سعودی عرب کے ولی عہد اور وزیر اعظم محمد بن سلمان السعود نے پیر کو یہاں ملاقات کی اور مختلف شعبوں میں وسیع البنیاد تعاون کو مضبوط بنانے پر اتفاق کیا۔
ریاض میں ہونے والی ملاقات میں فریقین نے مکہ مکرمہ میں اپنی سابقہ ملاقات کے دوران کیے گئے فیصلوں کے حوالے سے پیش رفت پر اطمینان کا اظہار کیا۔
وزیراعظم شہباز شریف نے حال ہی میں سعودی وزیر خارجہ کی قیادت میں اعلیٰ سطحی وفد پاکستان بھیجنے پر سعودی ولی عہد کا شکریہ ادا کیا۔
انہوں نے مختلف شعبوں میں سرمایہ کاری کو فروغ دینے کے لیے پاکستان میں مزید وفود بھیجنے میں ولی عہد کی دلچسپی کو سراہا۔
وزیراعظم نے سعودی عرب کے دورے کے دوران شاندار مہمان نوازی اور پاکستان میں سعودی سرمایہ کاری کے حوالے سے جامع پروگرام پر ولی عہد کا شکریہ ادا کیا۔
وزیراعظم شہباز شریف نے سعودی ولی عہد کو دورہ پاکستان کی دعوت کا اعادہ کیا۔
دونوں رہنماؤں کے مابین ملاقات میں غزہ کی صورتحال پر بھی بات چیت ہوئی۔
