پاک، افغان سرحد کے قریب انٹیلی جنس آپریشن میں 7 دہشت گرد ہلاک، آئی ایس پی آر
پاک فوج کے شعبہ تعلقات عامہ آئی ایس پی آر کے مطابق 22 جنوری 2024 کو پاکستان، افغان سرحد کے قریب ضلع ژوب کے سمبازہ سیکٹر میں انٹیلی جنس آپریشن کے دوران فائرنگ کا تبادلہ ہوا۔
پاک فوج کے دستوں نے فرار ہونے والے دہشت گردوں کو مؤثر طریقے سے گھیرے میں لے لیا جس کے نتیجے میں سات دہشت گرد ہلاک ہوگئے جو سیکورٹی فورسز کے خلاف دہشت گردانہ سرگرمیوں کے ساتھ ساتھ معصوم شہریوں کے قتل میں بھی سرگرم رہے۔
ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد ہوا ہے۔
آئی ایس پی آر کے مطابق علاقے میں موجود دیگر دہشت گردوں کو ختم کرنے کے لیے سینی ٹائزیشن آپریشن کیا جا رہا ہے۔ پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں۔
