ٹی ٹوئنٹی ورلڈ کپ سے قبل تلک ورما انجری کا شکار

  تلک ورما کمر کی تکلیف کی سرجری کے باعث تقریباً تین ہفتوں تک کرکٹ سے دور رہیں گے بدھ کو ہونے والی سرجری کے باعث وہ 21 سے 25 جنوری کے درمیان نیوزی لینڈ کے خلاف ابتدائی تین ٹی ٹوئنٹی میچز میں شرکت نہیں کر سکیں گے۔

بی سی سی آئی کے مطابق تلک ورما کو جمعرات کی صبح ہسپتال سے ڈسچارج کر دیا گیا ہے اور وہ جمعہ کو حیدرآباد روانہ ہوں گے بورڈ نے بتایا کہ ان کی حالت مستحکم ہے اور صحت یابی کا عمل تسلی بخش انداز میں جاری ہے۔

23 سالہ تلک ورما اب تک بھارت کے لیے 40 ٹی ٹوئنٹی میچ کھیل چکے ہیں اور حالیہ تین میچوں میں دو نصف سنچریاں اسکور کیں بی سی سی آئی نے واضح کیا ہے کہ 28 اور 31 جنوری کو نیوزی لینڈ کے خلاف سیریز کے آخری دو میچوں میں ان کی واپسی کا فیصلہ ان کی فٹنس پیش رفت کو دیکھتے ہوئے کیا جائے گا۔

واضح رہے کہ تلک ورما کو نیوزی لینڈ کے خلاف تین ایک روزہ میچوں کی سیریز کے لیے بھارتی اسکواڈ میں شامل نہیں کیا گیا تھا، جبکہ بھارت 7 فروری کو امریکہ کے خلاف گروپ اے میچ سے اپنے ٹی ٹوئنٹی ورلڈ کپ ٹائٹل کے دفاع کا آغاز کرے گا۔