Sultan Shah re-elected as President of World Blind Cricket Council-PBCC
اردوانٹرنیشنل (اسپورٹس ڈیسک) تفصیلات کے مطابق پاکستان بلائنڈ کرکٹ کونسل کے چیئرمین سید سلطان شاہ آئندہ دو سالہ مدت کے لیے دوبارہ ورلڈ بلائنڈ کرکٹ کونسل کے صدر منتخب ہو گئے ہیں۔
ہندوستان سے راجنیش ہنری کو کامیابی کے ساتھ سیکرٹری جنرل منتخب کیا گیا ورلڈ بلائنڈ کرکٹ کونسل کی 26ویں جنرل کونسل کا اجلاس ملتان کے مقامی ہوٹل میں ہوا جس میں آسٹریلیا، جنوبی افریقہ، پاکستان، سری لنکا، بنگلہ دیش، نیپال اور افغانستان کے کرکٹ بورڈز کے نمائندوں نے شرکت کی۔
ہندوستان، انگلینڈ اور نیوزی لینڈ کے عہدیداروں نے آن لائن شرکت کی۔
دیگر منتخب عہدیداروں میں نیپال کے پون گھمیرے فرسٹ نائب صدر، جنوبی افریقہ کے آئزک بڈلا دوسرے نائب صدر، آسٹریلیا کے ریمنڈ موکسلے گلوبل ڈویلپمنٹ ڈائریکٹر، پاکستان کے طاہر محمود بٹ ٹیکنیکل ڈائریکٹر اور ہندوستان کے چندر شیکھر فنانس ڈائریکٹر کے طور پر شامل ہوئے۔
جنوبی افریقہ کے مائیکل ڈی سلوا کو اسسٹنٹ سیکرٹری، سری لنکا کے سدیش تھرنگا کو پبلک ریلیشنز کا ڈائریکٹر اور علاقائی ترقی کے ڈائریکٹرز میں بنگلہ دیش کے معین اقبال ایشیا کے لیے اور جنوبی افریقہ کے نیاوز کو افریقی خطے کے لیے منتخب کیا گیا۔
سلطان شاہ نے بلائنڈ کرکٹ میں نئی اصلاحات متعارف کرانے اور امریکہ اور کینیا جیسے ممالک میں اس کھیل کو فروغ دینے کے لیے اقدامات کرنے کے منصوبے کا اظہار کیا۔
