پریمیئر لیگ: انجری ٹائم میں ہیری ولسن کے دو شاندار گول، فلہم کی برینٹ فورڈ کو شکست
اردو انٹرنیشنل ( اسپورٹس ڈیسک) فلہم کی ٹیم نے انگلش پریمیئر لیگ کے ایک میچ میں سخت مقابلے کے بعد برینٹ فورڈ کو 1-2 گول سے ہرا دیا۔
کریون کاٹیج، لندن، انگلینڈ میں کھیلے گئے اس میچ کے دوران فلہم اور برینٹ فورڈ کے درمیان زبردست مقابلہ ثابت ہوا، جس میں سبسٹیٹیوٹ ہیری ولسن نے انجری ٹائم میں فلہم کے لیے ناقابل یقین دو گول کر کے اپنی ٹیم کو فتح دلائی۔
برینٹ فورڈ کی جانب سے واحد گول وٹالی جینلٹ نے سکور کیا، میچ کے پہلے ہاف میں، برینٹ فورڈ کے ویٹالی جینلٹ نے 25 گز سے زبردست شاٹ کے ذریعے گول کیا، جس سے برینٹ فورڈ کو 1-0 کی برتری حاصل ہوئی۔
کھیل میں ایک اہم موڑ تب آیا جب کوچ نے آخری آٹھ منٹ میں ہیری ولسن کو میدان میں اتارا۔
انجری ٹائم میں، اداما ٹراورے کے کراس پر ولسن نے گیند کو اپنے بوٹ کے بیرونی حصے سے گول کیپر کے اوپر سے گول میں ڈال کر اسکور 1-1 کر دیا۔
اس کے بعد 97ویں منٹ میں انٹونی رابنسن کے کراس پر ولسن نے ایک شاندار ہیڈر مار کر دوسرا گول کیا اور فلہم کو 2-1 کی برتری دلائی، جس کے بعد اسٹیڈیم خوشی کے نعروں سے گونج اٹھا۔
یہ فلہم کی پریمیئر لیگ میں چوتھی فتح ہے اور وہ 15 پوائنٹس کے ساتھ ٹیبل پر دسویں نمبر پر پہنچ گئی ہے۔
