اردو انٹرنیشنل (اسپورٹس ویب ڈیسک) تفصیلات کے مطابق پریمیئر لیگ کے ایک میچ میں لیور پول اور ایورٹن مدمقابل تھے، گڈیسن پارک میں ہونے والے اس میچ میں لیورپول کی کامیابی یقینی نظر آرہی تھی، جس سے لیگ میں ان کی برتری نو پوائنٹس تک بڑھ سکتی تھی، لیکن میچ کے آخری سیکنڈز میں ایورٹن کے تارکوسکی نے برابری کا گول کر دیا۔
میچ کے 11ویں منٹ میں جیراڈ برانتھویٹ کی فری کک پر بیٹو نے گول کرکے ایورٹن کو برتری ابتدائی دلا دی۔ اس کے 5 منٹ بعد ہی، محمد صلاح کے کراس پر الیکسس میک الیسٹر نے گول کرکے اسکور برابر کر دیا اور پھر کھیل میں 17 منٹ باقی تھے جب، محمد صلاح نے برانتھویٹ کی غلط کلیئرنس کا فائدہ اٹھاتے ہوئے لیورپول کی جیت کو تقریبا یقینی بنا دیا۔ تاہم، میچ کے آخری لمحات میں جیمز تارکوسکی نے گول داغ کر میچ برابر کردیا۔
میچ کے دوران ماحول کافی گرم رہا۔ ایورٹن کے عبدولائے ڈوکور نے لیورپول کے شائقین کو اشتعال دلایا، جس پر لیورپول کے کرٹس جونز نے ردِعمل دیا، اور دونوں کھلاڑیوں کو ریفری نے باہر بھیج دیا۔ اس کے علاوہ، لیورپول کے مینیجر آرنے سلاٹ اور ان کے اسسٹنٹ کو بھی میچ کے بعد ریڈ کارڈ دے دیا گیا۔
لیورپول اس نتیجے کے بعد پریمیئر لیگ میں سات پوائنٹس کی برتری کے ساتھ سرفہرست ہے، لیکن اس ڈرامائی میچ کے بعد زیادہ خوشی ایورٹن کو ہوئی جو اپنی بہترین کارکردگی کے باعث ایک قیمتی پوائنٹ حاصل کرنے میں کامیاب رہا۔
