پاکستانی اولمپیئن صدف صدیقی ہنگری میں آئی او سی کوچنگ کورس کے لیے منتخب

اردو انٹرنیشنل (اسپورٹس ویب ڈیسک) تفصیلات کے مطابق اولمپیئن صدف صدیقی کو ہنگری یونیورسٹی آف اسپورٹ سائنسز میں شروع ہونے والے بین الاقوامی جنرل کنڈیشننگ کوچنگ کورس کے لیے منتخب کیا گیا ہے۔ یہ کورس اکتوبر کے پہلے ہفتے میں شروع ہوگا۔

یہ کورس بین الاقوامی اولمپک کمیٹی (آئی او سی) کے ایک منصوبے کا حصہ ہے جس کا مقصد ترقی پذیر ممالک کے کوچز اور آفیشلز کو جدید تربیت فراہم کرکے کوچنگ کے معیار کو بہتر بنانا ہے۔ صدف صدیقی نے حال ہی میں پاکستان اولمپک ایسوسی ایشن (پی او اے) کی نائب صدر بیگم عشرت اشرف اور پاکستان اولمپک ایسوسی ایشن کے سیکریٹری جنرل محمد خالد محمود سے ملاقات کی۔ اس ملاقات میں انہوں نے خواتین کے کھیلوں کی ترقی کے حوالے سے اپنے مستقبل کے منصوبوں پر بات کی۔

بیگم عشرت اشرف نے اس ملاقات کے دوران صدف کی حمایت کرتے ہوئے کہا کہ “یہ بین الاقوامی کوچنگ اور مینجمنٹ کورس صدف کے لیے اپنی صلاحیتیں بڑھانے کا ایک بہترین موقع ہے۔ یہ خواتین کوچز کے لیے تعلیم حاصل کرنے اور اپنی نظریاتی، تکنیکی، اور عملی کوچنگ کی مہارت کو بہتر بنانے کے لیے اہم ہے۔”