پہلے ون ڈے میں پاکستان کو بنگلہ دیش کے ہاتھوں عبرتناک شکست

میرپور میں کھیلے گئے تین ون ڈے میچز کی سیریز کے پہلے مقابلے میں بنگلادیش نے پاکستان کو 8 وکٹوں سے شکست دے دی۔

میزبان ٹیم نے 115 رنز کا ہدف باآسانی 16ویں اوور کی پہلی گیند پر حاصل کر لیا۔

اس سے قبل بنگلادیش نے ٹاس جیت کر پہلے فیلڈنگ کا فیصلہ کیا جس کے بعد پاکستان کی پوری ٹیم 114 رنز بنا کر آؤٹ ہو گئی پاکستان کی جانب سے فہیم اشرف 37 رنز کے ساتھ نمایاں رہے جبکہ صاحبزادہ فرحان نے 27 اور معاذ صداقت نے 18 رنز بنائے۔

دیگر بیٹرز میں محمد رضوان 10، سلمان علی آغا 5، شامل حسین 4، حسین طلعت 4 اور کپتان شاہین شاہ آفریدی بھی 4 رنز بنا کر آؤٹ ہوئے جبکہ عبدالصمد اور محمد وسیم بغیر کوئی رن بنائے پویلین لوٹ گئے۔

بنگلادیش کی جانب سے ناہید رانا نے شاندار بولنگ کا مظاہرہ کرتے ہوئے 24 رنز دے کر 5 وکٹیں حاصل کیں جبکہ مہدی حسن میراز نے 29 رنز کے عوض 3 کھلاڑیوں کو آؤٹ کیا۔

ہدف کے تعاقب میں بنگلادیش کی ٹیم نے جارحانہ انداز اپنایا، تنزید حسن نے 67 رنز کی ناقابل شکست اننگز کھیلی جبکہ نجم الحسین شنتو نے 27 رنز بنائے۔

پاکستان کی جانب سے شاہین شاہ آفریدی اور محمد وسیم نے ایک، ایک وکٹ حاصل کی۔

واضح رہے کہ پاکستان کا بنگلادیش کے خلاف ون ڈے کرکٹ میں 114 رنز کم ترین اسکور ہے۔