پاکستان کی ایران پر اسرائیلی حملوں کی مذمت، اقوام متحدہ سے امن کیلئے کردار ادا کرنے کا مطالبہ
اردو انٹرنیشنل ( مانیٹرنگ ڈیسک) پاکستان نے ایران پر اسرائیلی حملے کی شدید مذمت کرتے ہوئے اسے اقوام متحدہ کے چارٹر اور عالمی قوانین کی کھلم کھلاخلاف ورزی قرار دیا ہے اور سلامتی کونسل سے امن کے لیے کردار ادا کرنے کا مطالبہ کیا ہے۔
سماجی رابطے کی ویب سائٹ پر جاری بیان میں وزیراعظم پاکستان شہباز شریف کا کہنا تھا کہ ایران کے خلاف اسرائیلی جارحیت کے حالیہ اقدام پر شدید تشویش ہے، صہیونی ریاست کے اس اقدام کی شدید مذمت کرتے ہیں۔
شہباز شریف نے کہا کہ اس طرح کے اقدامات سے علاقائی امن واستحکام کو خطرہ ہے، یہ حملے خود مختاری اور بین الاقوامی قانون کے اصولوں کی خلاف ورزی ہے ۔
انہوں نے مزید کہا کہ پاکستان امن کے حصول کے لیے ایران اور دیگر ہمسایہ ممالک کے ساتھ مل کر کام کرتا رہے گا۔
قبل ازیں دفتر خارجہ نے ایک بیان میں ایران پر اسرائیل کے حملوں کی مذمت کرتے ہوئے کہا کہ یہ حملے علاقائی امن واستحکام کو نقصان پہنچاتے ہیں، حملوں سے خطے میں عدم استحکام خطرناک حد تک بڑھ گیا ہے۔
ان کا مزید کہنا تھا کہ اسرائیلی فوجی حملے اقوام متحدہ کے چارٹر اور بین الاقوامی قوانین کی سنگین خلاف ورزی ہے، یہ حملے علاقائی امن اور استحکام کے راستے کے لیے نقصان دہ ہیں۔
ممتاز زہرہ بلوچ کا کہنا تھا کہ ہم اقوام متحدہ سلامتی کونسل سے مطالبہ کرتے ہیں کہ وہ بین الاقوامی امن و سلامتی کے قیام کے لیے اپنا کردار ادا کرے، اقوام متحدہ سلامتی کونسل خطے میں اسرائیلی جارحیت اور مجرمانہ رویے کے خاتمے کے لیے فوری اقدامات کرے۔
انہوں نے کہا کہ عالمی برادری کو بھی علاقائی امن و سلامتی کی بحالی کے لیے اپنا کردار ادا کرنا چاہیے۔
واضح رہے کہ اسرائیلی فوج نے گزشتہ رات گئے ایران پر فضائی حملہ کرتے ہوئے دعویٰ کیا کہ انہوں نے حملے میں میزائل سازی کی تنصیبات، و دیگر اہداف کو نشانہ بنایا ہے۔