پاک آرمی نے مینز نیشنل روڈ سائیکلنگ چیمپئن شپ 2024 کا ٹائٹل جیت لیا

اردو انٹرنیشنل (اسپورٹس ویب ڈیسک) تفصیلات کے مطابق پاکستان آرمی نے 2 سے 4 دسمبر تک لاہور میں منعقد ہونے والی مینز نیشنل روڈ سائیکلنگ چیمپئن شپ 2024 کا ٹائٹل جیت لیا۔ ایونٹ میں ملک بھر کی 8 ٹیموں نے حصہ لیا، جن میں پاکستان آرمی، واپڈا، ایچ ای سی، ریلوے اور دیگر شامل تھیں۔

چیمپئن شپ تین دنوں پر مشتمل تھی جس میں پہلے دن 40 کلومیٹر انفرادی ٹائم ٹرائل میں آرمی کے ایم بلال نے شاندار کارکردگی دکھا کر پہلی پوزیشن حاصل کی۔ دوسرے دن 70 کلومیٹر ٹیم ٹائم ٹرائل میں بھی آرمی نے برتری حاصل کی آخری اور تیسرے دن 120 کلومیٹر روڈ سکریچ ریس میں ایم بلال دوبارہ فاتح قرار پائے۔

پاکستان آرمی مجموعی طور پر 79 پوائنٹس کے ساتھ چیمپئن بن گئی، جبکہ واپڈا 67 پوائنٹس کے ساتھ دوسرے اور ریلوے 18 پوائنٹس کے ساتھ تیسرے نمبر پر رہی۔ سندھ 12 پوائنٹس کے ساتھ چوتھے نمبر پر آیا۔

آرمی کی شاندار کارکردگی نے انہیں یہ ٹائٹل جیتنے میں مدد دی، جبکہ واپڈا اور ریلوے نے بھی اچھی کارکردگی کا مظاہرہ کیا۔
پی سی ایف کے صدر ادریس حیدر خواجہ نے ایونٹ کی کامیابی کو شاندار قرار دیا اور کھلاڑیوں کی کارکردگی کو سراہا۔ سیکرٹری معظم خان کلیئر نے مستقبل میں سائیکلنگ کو مزید فروغ دینے کے عزم کا اظہار کیا۔

معظم خان نے وقار علی، طلحہ بابر، قصیر صادق، شہزادہ بٹ، نعمان، حیدر علی، شاہ زمان، زاہد گلفام اور دیگر کا بھی شکریہ ادا کیا، جن کی انتھک محنت سے چیمپئن شپ کے کامیاب انعقاد کو یقینی بنایا گیا۔ اس کے علاوہ ایونٹ کی کامیابی میں معاون کردار ادا کرنے پو ڈی ایچ اے لاہور کا بھی خصوصی شکریہ ادا کیا ۔