وائٹ ہاؤس نے اسرائیلی وزیر اعظم بنجمن نیتن یاہو کی اگلے ہفتے امریکہ دورے کی تصدیق کردی۔ نیتن یاہو 4 فروری کو امریکہ کا دورہ کریں گے اور وہ ٹرمپ کے دوسرے دور صدارت میں وائٹ ہاؤس میں مدعو ہونے والے پہلے غیر ملکی رہنما ہوں گے۔
ٹرمپ نے صحافیوں کو بتایا کہ نیتن یاہو “بہت جلد”ان سے ملاقات کریں گے۔ یہ ملاقات ایک ایسے وقت میں ہو رہی ہے جب اسرائیل اور حماس کے درمیان چھ ہفتوں کے لیے جنگ بندی معاہدہ طے پاچکا ہے۔ صدر ٹرمپ نے دعویٰ کیا ہے کہ جنگ بندی معاہدہ ان کی کامیابی کی وجہ سے ممکن ہوا ہے۔ ٹرمپ نے فلسطینیوں کو غزہ سے نکال کر مصر اور اردن بھیجنے کی تجویز بھی دی، جسے حماس، فلسطینی قیادت، مصر اور اردن نے مسترد کر دیا۔
جبکہ اسرائیل کے سخت گیر سیاستدان پہلے سے ہی اس منصوبے کی حمایت کر رہے ہیں اور چاہتے ہیں کہ فلسطینی غزہ چھوڑ دیں۔
یاد رہے، 7 اکتوبر 2023 کو حماس کے حملے میں اسرائیل کے 1,200 افراد ہلاک اور 251 افراد کو یرغمال بنایا گیا۔ اسرائیل نے جوابی کارروائی میں غزہ پر بمباری کی، جس میں 47 ہزار سے زائد فلسطینی مارے گئے، جن میں زیادہ تر عام شہری شامل تھے۔
