ڈارون نونیز کی شاندار کارکردگی، لیورپول کاراباؤ کپ کے سیمی فائنل میں پہنچ گیا

اردو انٹرنیشنل (اسپورٹس ویب ڈیسک) تفصیلات کے مطابق ڈارون نونیز کی شاندار پرفارمنس نے لیورپول کو ساؤتھمپٹن کے خلاف 2-1 سے فتح دلائی اور ٹیم کو کاراباؤ کپ کے سیمی فائنل میں جگہ دلائی۔ نونیز جو گزشتہ چھ میچوں سے ٹیم کے لیے کوئی بھی گول کرنے میں ناکام رہے تھے اس میچ میں انہوں نے ہاروی ایلیٹ کے ساتھ مل کر لیورپول کی فتح کو یقینی بنایا ۔

ساؤتھمپٹن کی ٹیم، جو کہ عبوری مینیجر سائمن رسک کی قیادت میں کھیل رہی تھی، نے زبردست آغاز کیا لیکن 24ویں منٹ میں پیچھے رہ گئی جب لیورپول کے ٹرینٹ الیگزینڈر-آرنولڈ نے شاندار مہارت سے ساؤتھمپٹن کے دباؤ کو کنٹرول کیا اور ایک بہترین تھرو پاس کے ذریعے نونیز کو گیند دی۔ نونیز نے اس موقع کو خوبصورتی سے گول میں تبدیل کیا۔ پھر اس کے آٹھ منٹ بعد، ہاروی ایلیٹ نے اپنی ٹیم کی برتری کو 2-0 کر دیا۔

ساؤتھمپٹن کے کیمرون آرچر نے شاندار گول کے ذریعے ٹیم کے لیے امید کی کرن پیدا کی۔ تاہم، لیورپول کی مضبوط دفاعی حکمت عملی نے ساؤتھمپٹن کو برابری کرنے سے باز رکھا۔

لیورپول نے ہاف ٹائم کے بعد چند تبدیلیاں کیں، الیگزینڈر-آرنولڈ اور جو گومز کو آرام دیا گیا۔ ساؤتھمپٹن نے چند خطرناک حملے کیے لیکن برابری کرنے میں ناکام رہے۔ انجری ٹائم میں ساؤتھمپٹن نے فری کِک کے لیے اپیل کی، لیکن ریفری نے اپیل مسترد کر دی۔

لیورپول کی ٹیم ، جو کہ پچھلے سیزن کے فاتح ہے، اب سیمی فائنل میں آرسنل اور نیوکاسل کے ساتھ شامل ہو گیا ہے۔ سیمی فائنل کے لیے چوتھی ٹیم کا فیصلہ ٹوٹنہم اور مانچسٹر یونائیٹڈ کے درمیان جمعرات کو ہونے والے میچ سے ہوگا۔