اردو انٹرنیشنل (اسپورٹس ویب ڈیسک) تفصیلات کے مطابق آسٹن ولا نے بدھ کے روز چیمپئنز لیگ میں بائرن میونخ کو 1-0 سے شکست دی۔ یہ جیت آسٹن ولا کے لیے اس لیے بھی بہت اہمیت کی حامل تھہی کیونکہ انہوں نے 41 سال بعد چیمپئنز لیگ مقابلے میں اپنے ہوم گراؤنڈ پر پہلا میچ کھیلا تھا۔

اس جیت کا سہرا ولا کے جون ڈوران کے شاندار گول کو جاتا ہے،جون نے 79 ویں منٹ میں، ایک اونچی گیند پر تیزی سے دوڑ لگائی اور جب انہوں نے دیکھا کہ بائرن میونخ کے گول کیپر مینوئل نیور گول پوسٹ سے باہر ہیں، تو انہوں نے چالاکی سے گیند کو ان کے اوپر سے گول میں ڈال دیا ، جس پر ولا پارک اسٹیڈیم میں موجود شائقین خوشی سے جھوم اٹھے۔ 20 سالہ کولمبیائی اسٹرائیکر جون ڈوران نے اس سیزن میں پریمیئر لیگ میں چار گول کیے ہیں، اور یہ چیمپئنز لیگ میں ان کا پانچواں گول تھا، جو انہوں نے بطور متبادل کھلاڑی بینچ سے آ کر کیا۔

تاہم میچ کے دوران بائرن میونخ نے زیادہ تر وقت گیند پر کنٹرول رکھا، لیکن انہوں نے کئی بہترین مواقع ضائع کیے۔

آسٹن ولا کے گول کیپر ایمیلیانو مارٹینز نے جون ڈوران کی کارکردگی کو سراہتے ہوئے کہا، “وہ ایک بہترین متبادل کھلاڑی ہے۔ جب اس نے پہلی بار گیند کو چھوا، تو اس نے نیور کے اوپر سے گیند پھینک کر گول کیا، جو کہ تاریخ کے سب سے خوبصورت گولوں میں سے ایک ہے۔”

مارٹینز نے خود بھی میچ کے دوران کئی شاندار سیو کیے، جو ٹیم کی جیت میں بہت اہم ثابت ہوئے۔ یہ فتح ایسٹن ولا کے لیے ایک یادگار لمحہ تھا، کیونکہ اس سے پہلے 1982 میں انہوں نے بائرن میونخ کو شکست دے کر یورپی کپ اپنے نام کیا تھا۔