آئی سی سی ٹی ٹوئنٹی رینکنگ میں بابر اعظم کی ترقی، رضوان اور شاہین کی تنزلی

اردوانٹرنیشنل (اسپورٹس ڈیسک) تفصیلات کے مطابق اوپننگ بلے باز بابر اعظم نے تازہ ترین آئی سی سی ٹی ٹوئنٹی رینکنگ میں نمایاں ترقی کی، جبکہ وائٹ بال کے کپتان محمد رضوان اور بائیں ہاتھ کے تیز گیند باز شاہین آفریدی کو بڑی تنزلی کا سامنا کرنا پڑا۔

بابر، جو اب چھٹے نمبر پر ہیں، نے رضوان کو پیچھے چھوڑ دیا ہے، جو آئی سی سی کی تازہ ترین ٹی ٹوئنٹی بیٹر رینکنگ میں 704 ریٹنگ پوائنٹس کے ساتھ آٹھویں نمبر پر ہیں۔

آسٹریلیا کے ٹریوس ہیڈ 855 ریٹنگ پوائنٹس کے ساتھ نمبر1 ٹی ٹوئنٹی بلے باز کے طور پر غلبہ برقرار رکھے ہوئے ہیں، اس کے بعد انگلینڈ کے فل سالٹ دوسرے اور بھارت کے تلک ورما تیسرے نمبر پر ہیں۔

باولنگ رینکنگ میں شاہین آفریدی 599 ریٹنگ پوائنٹس کے ساتھ ایک درجہ تنزلی کے ساتھ 20 ویں سے 21 ویں نمبر پر آگئے ہیں حارث رؤف بھی تین درجے تنزلی کے ساتھ 573 ریٹنگ پوائنٹس کے ساتھ 26 ویں نمبر پر آ گئے۔

نوجوان فاسٹ باولر عباس آفریدی 526 ریٹنگ پوائنٹس کے ساتھ 43 ویں سے 41 ویں نمبر پر پہنچ گئے۔

شاداب خان کو بھی نمایاں کمی کا سامنا کرنا پڑا، وہ 444 ریٹنگ پوائنٹس کے ساتھ چھ درجے گر کر 71ویں نمبر پر آگئے۔

ویسٹ انڈیز کے عقیل حسین انگلینڈ کے عادل رشید کو پیچھے چھوڑکر نمبر ون ٹی ٹوئنٹی باؤلربن گئے راشد اب دوسرے نمبر پر ہیں، سری لنکا کے وینندو ہاسرنگا تیسرے نمبر پر ہیں۔

آئی سی سی ون ڈے رینکنگ پر توجہ مرکوز کرتے ہوئے، صائم ایوب اور عبداللہ شفیق دونوں کو اپنی پوزیشنوں میں تنزلی کا سامنا کرنا پڑا۔

پہلے ون ڈے میں جنوبی افریقہ کے خلاف سنچری بنانے کے باوجود صائم ایک مقام گر کر 470 پوائنٹس کے ساتھ 80ویں نمبر پر آ گئے عبداللہ شفیق بلے سے جدوجہد کرتے ہوئے 472 پوائنٹس کے ساتھ 77ویں نمبر پر آ گئے۔

دریں اثنا، فخر زمان (16ویں)، امام الحق (18ویں) اور محمد رضوان (24ویں) جیسے کھلاڑیوں نے اپنی رینکنگ برقرار رکھی ہے۔

بابر اعظم نمبر ون ون ڈے بلے باز کے طور پر غلبہ برقرار رکھے ہوئے ہیں، بھارت کے روہت شرما اور شبمن گل بالترتیب دوسرے اور تیسرے نمبر پر ہیں۔

ون ڈے بولنگ رینکنگ میں حارث رؤف 15 ویں نمبر پر برقرار ہیں جب کہ محمد وسیم جونیئر 52 ویں، نسیم شاہ 61 ویں اور محمد نواز 67 ویں نمبر پر ہیں۔

دریں اثنا، ٹیسٹ بیٹنگ رینکنگ میں بابر اعظم ایک درجہ ترقی کرتے ہوئے 670 ریٹنگ پوائنٹس کے ساتھ 17ویں نمبر پر پہنچ گئے۔

سلمان علی آغا اور محمد رضوان بالترتیب 19ویں اور 20ویں پوزیشن پر برقرار ہیں۔