چین: طوفانی بارشوں کی وجہ سے سڑک کا ایک حصہ گرنے سے24 افراد ہلاک
اردو انٹرنیشنل (مانیٹرنگ ڈیسک) جنوبی چین کے صوبہ گوانگ ڈونگ میں شدید بارشوں کے باعث ہائی وے کے ایک حصے کے منہدم ہونے سے کم از کم 24 افراد ہلاک ہو گئے۔
خبر رساں ادارے ’اے ایف پی‘ کے مطابق ایک گنجان آباد صنعتی پاور ہاؤس گوانگ ڈونگ حالیہ ہفتوں میں طوفانی بارشوں کی زد میں ہے جس سے کچھ علاقوں میں شدید سیلاب اور لینڈ سلائیڈنگ ہوئی ہے۔
سرکاری خبر رساں ایجنسی ژنہوا نے بتایا کہ بدھ کی صبح تقریباً 2 بجکر 10 منٹ پر گوانگ ڈونگ صوبے میں میزو شہر اور ڈابو کاؤنٹی کے درمیان سڑک کا ایک حصہ دھنس گیا۔
چند عینی شاہدین نے مقامی میڈیا کو بتایا کہ وہ ایک گاڑی میں سوار اسی ہائی وے پر سفر میں تھے کہ اچانک بڑے زور کی ایک آواز پیدا ہوئی اور پھر انہوں نے پیچھے مڑ کر دیکھتا تو جہاں سے وہ گزر کر آئے تھے، وہیں پر اس ہائی وے کا ایک حصہ بیٹھ چکا تھا۔ ان شاہدین کے مطابق متعلقہ جگہ پر ہائی وے کا ایک کئی میٹر طویل حصہ ہی ناپید ہو چکا تھا۔
ژنہوا کے مطابق اس واقعے کی وجہ سے 20 گاڑیاں پھنس گئیں جن میں کل 54 افراد سوار تھے۔
ژنہوا نے کہا کہ سہ پہر 3 بجے تک 24 لوگوں کی موت کی تصدیق ہو چکی تھی جبکہ 30 افراد ہسپتال میں زیر علاج ہیں۔
متاثرین کے زخموں کی وضاحت کیے بغیر سرکاری خبر رساں ایجنسی نے بتایا کہ بحالی کا کام جاری ہے اور ہسپتال میں زیر علاج افراد کی زندگیاں فی الحال خطرے سے باہر ہیں۔
ریاستی نشریاتی ادارے سی سی ٹی وی کی طرف سے شائع ہونے والی ایک فضائی تصویر میں تباہ شدہ گاڑیاں ایک گہرے کیچڑ کے گڑھے میں پڑی دکھائی دیتی ہیں جہاں کبھی ہائی وے تھا۔
سوشل میڈیا پر گردش کرنے والی بظاہر طلوع سورج سے پہلے فلمائی گئی ویڈیوز میں گڑھے سے شعلے اور دھواں نکلتے دیکھے جاسکتے ہیں۔
ایک شخص کو ایک ویڈیو میں یہ کہتے ہوئے سنا گیا ہے کہ آپ مزید نہیں جا سکتے، تاہم اے ایف پی فوری طور پر ان ویڈیوز کی تصدیق نہیں کرسکا۔
سی سی ٹی وی نے کہا کہ ہائی وے کا منہدم ہونا ایک قدرتی آفت ہے، انہوں نے رپورٹ کیا کہ سڑک کا تقریباً 18 میٹر کا حصہ گر گیا ہے۔
سی سی ٹی وی کے مطابق اس ہائی وے کا منہدم ہو جانے والا حصہ مائی ژُو دابو ایکسپریس وے کے نزدیک تھا۔ حادثے کے بعد 500 کے قریب پولیس اہلکار، فائر بریگیڈ کے کارکن اور دیگر ریسکیو ورکر وہاں امدادی کاموں میں مصروف ہو گئے۔
براڈکاسٹر کے مطابق ان میں عوامی تحفظ، ہنگامی ردعمل، فائر فائٹنگ اور کان کنی سے بچاؤ کو سنبھالنے والے محکموں کے افراد شامل ہیں۔
مقامی حکام نے ایک نوٹس میں کہا کہ ایس 12 ہائی وے کا کچھ حصہ دونوں سمتوں سے بند کر دیا گیا ہے اور ڈرائیوروں کو دوسرا راستہ اختیار کرنے کا حکم دیا گیا ہے۔