اردو انٹرنیشنل (مانیٹرنگ ڈیسک) وفاقی وزیرِ توانائی سردار اویس احمد خان لغاری کا کہنا ہے کہ پاک روس تعلقات پر مغرب کو ناراض نہیں ہونا چاہیے۔
روسی میڈیا کو انٹرویو دیتے ہوئے انہوں نے کہا کہ پاک روس تعلقات نہ کسی کو نقصان پہنچانے کیلئے نہ کسی کے مفاد کے خلاف ہیں۔
انہوں نے کہا کہ ہم پاک روس تعلقات سے دونوں ممالک کے عوام کو فائدہ پہنچانا چاہتے ہیں، یہ فوائد اقتصادی فوائد میں تبدیل ہو جائیں گے۔
اویس لغاری کا کہنا ہے کہ تیسری دنیا کے ممالک کی ترقی کے لیے عالمی طاقتوں کے درمیان مؤثر اور مسلسل رابطہ ناگزیر ہے۔
وفاقی وزیر نے کہا کہ مارچ سے پاکستان اور روس کے درمیان آزمائشی مال بردار ٹرین چلے گی، ہم پاکستان اور روس کے درمیان براہِ راست فضائی سروسز کے قیام پر غور کر رہے ہیں۔
ان کا یہ بھی کہنا ہے کہ پاکستان کو برکس کے اندر رکن ممالک سے بہتر اور قریبی علاقائی تعاون کا فائدہ ہو سکتا ہے۔
