واشنگٹن طیارہ حادثہ: ہلاک ہونے والوں میں بوسٹن کے اسکیٹنگ کلب کے فگر اسکیٹرز بھی شامل

واشنگٹن کے رونلڈ ریگن ائیر پورٹ پر امریکی ائیر لائنز کے طیارے اور ایک فوجی ہیلی کاپٹر کے درمیان تصادم کے نتیجے میں تمام مسافر ہلاک ہو گئے۔ حادثہ بدھ کی رات پوٹومک دریا کے اوپر پیش آیا جب دونوں طیارے پانی میں گر گئے۔

حادثے میں بوسٹن کے اسکیٹنگ کلب کے نوجوان فگر اسکیٹرز جینا ہان (15 سال) اور سپینسر لین (16 سال) بھی شامل تھے، جو امریکی فگر اسکیٹنگ چیمپیئن شپ مقابلوں میں شرکت کے بعد واپس آ رہے تھے۔ ان کے ساتھ ان کی مائیں، جن ہان اور کرسٹین لین، اور کوچ ایوگینیا ششکووا اور ودیم نوموف بھی موجود تھے۔ ششکووا اور نوموف 1994 کی ورلڈ چیمپئن شپ میں پیرس ٹائٹل جیت چکے تھے اور دو بار اولمپکس میں بھی شرکت کر چکے تھے۔

یو ایس فگر اسکیٹنگ نے اس حادثے پر شدید رنج و غم کا اظہار کیا ہے، اسکیٹنگ کلب کے سی ای او،ڈگ زیگھائب نے جذباتی انداز میں کہا “اس کے ہماری کمیونٹی پر دور رس اثرات مرتب ہوں گے ۔” جبکہ امریکی ائیر لائنز نے متاثرہ خاندانوں کی مدد کے لیے ہاٹ لائن اور سینٹرز قائم کردیے ہیں۔