کھیلوں کی عالمی عدالت نے بھارتی ریسلر ونیش پھوگٹ کی اپیل مسترد کردی

اردو انٹرنیشنل اسپورٹس ویب ڈیسک تفصیلات کے مطابق کھیلوں کی عالمی عدالت برائے ثالثی نے بھارتی خاتون پہلوان ونیش پھوگٹ کی اپیل کو مسترد کر دیا ہے۔ ونیش پھوگٹ نے اولمپکس کی خواتین ریسلنگ ایونٹ سے ڈسکوالیفائی ہونے کے فیصلے کے خلاف اپیل دائر کی تھی جو کہ آج مسترد کردی گئی ہے۔

یاد رہے کہ بھارتی ویمن ریسلر ونیش پھوگٹ کو 100 گرام وزن زیادہ ہونے کی بنا پر 50 کلوگرام کیٹیگری کے فائنل سے خارج کر دیا گیا تھا۔

انہوں نے پہلے روز صحیح وزن ہونے کی بنیاد پر سلور میڈل کے لیے اپیل دائر کی تھی۔ تاہم، عدالت نے ان کی درخواست کو رد کرتے ہوئے عالمی ریسلنگ فیڈریشن کے فیصلے کو برقرار رکھا ہے۔

عدالت کی جانب سے جاری کردہ مختصر فیصلے میں کہا گیا ہے کہ ونیش پھوگٹ کی اپیل کو تسلیم نہیں کیا گیا ہے اور اس کا تفصیلی فیصلہ بعد میں جاری کیا جائے گا۔