پشاور ہائی کورٹ نے اسد قیصر کا نام ای سی ایل سے نکالنے کا حکم دے دیا
اردو انٹرنیشنل(مانیٹرنگ ڈیسک) تفصیلات کے مطابق پشاور ہائی کورٹ نے سابق سپیکر قومی اسمبلی اسد قیصر کا نام ای سی ایل سے نکالنے کا حکم جاری کر دیا.
پشاور ہائیکورٹ کے جسٹس شکیل احمد اور جسٹس صاحبزادہ اسد اللہ نے اسد قیصر کا نام ایگزٹ کنٹرول لسٹ (ای سی ایل) میں ڈالنے کے خلاف دائر درخواست پر سماعت کی.
اسد قیصر کے وکیل معظم بٹ ایڈووکیٹ نے عدالت کو بتایا کہ اسد قیصر عمرہ کی ادائیگی کے لیے جارہے تھے لیکن ان کو روکا گیا۔
جسٹس صاحبزادہ اسد اللہ نے سوال کیا کہ اسد قیصر کا نام کب ای سی ایل میں شامل کیا گیا؟ وکیل نے بتایا کہ 23 جون کو ان کا نام ای سی ایل پر ڈالا گیا۔
جسٹس شکیل احمد نے استفسار کیا کہ یہ اب ممبر قومی اسمبلی بھی منتخب ہوئے ہیں؟ جس پر وکیل نے جواب دیا کہ جی یہ ممبر قومی اسمبلی ہیں اور سینئر سیاستدان ہیں۔
عدالت نے 23 جون 2023 کو اسد قیصر کا نام ای سی ایل میں ڈالنے کا آرڈر غیر آئینی قرار دے کر فوری طور پر ان کا نام ای سی ایل سے نکالنے کا حکم دے دیا.
