لوگ اقتدار کے لیئے اتحادی بناتے ہیں مگر ہمارے لیئے عوام ہی کافی ہے،آصف زرداری
سابق صدر اور شریک چیئرمین پاکستان پیپلز پارٹی آصف علی زرداری نے اپنے ایک بیان میں کہا ہے کہ تھر کے عوام نے بلاول بھٹو زرداری کا شاندار استقبال کرکے اپنا فیصلہ سنا دیا ہے۔آصف علی زرداری نےتھر میں عظیم الشان جلسہ کے انعقاد پر جیالوں کو خراج تحسین بھی پیش کیا، انہوں نے کہا کہ تھر کے عوام اپنی بہن محترمہ بینظیر بھٹو شہید کو نہیں بھولے۔
آصف علی زرداری نے کہا کہ کچھ لوگ اقتدار کے لیئے اتحادی بناتے ہیں مگر ہمارے لیئے عوام ہی کافی ہے، پیپلزپارٹی کے خلاف ماضی میں بھی اتحاد بنائے گئے ایسے اتحادوں کی کوئی پرواہ نہیں ہے.
سابق صدر نے کہا کہ ذوالفقار علی بھٹو شہید کا فلسفہ عوام کے قدموں میں سیاسی جنت ہے ہمارے لیئے مشعل راہ ہے، انہوں نے کہا کہ عام انتخابات میں پیپلزپارٹی ساحل سمندر سے لیکر خیبر پختونخوا تک کامیابی حاصل کریگی.
