اردوانٹرنیشنل (اسپورٹس ڈیسک) تفصیلات کے مطابق پاکستان کرکٹ ٹیم کے آئندہ دورہ جنوبی افریقہ کے لیے اسکواڈ کا اعلان آئندہ ہفتے متوقع ہے۔
ذرائع کے مطابق قومی ٹیم جنوبی افریقہ میں 3 ون ڈے، 3 ٹی ٹوئنٹی اور 2 ٹیسٹ میچز پر مشتمل سیریز کھیلے گی سیریز سے قبل موجودہ سکواڈ میں کچھ تبدیلیاں کی جا سکتی ہیں۔
پی سی بی ذرائع نے عندیہ دیا ہے کہ اوپنر فخر زمان کی وائٹ بال سیریز کے لیے واپسی ہوگی جب کہ بلے باز صائم ایوب کی بھی ٹی ٹوئنٹی اسکواڈ میں واپسی متوقع ہے۔
اس کے علاوہ ٹیسٹ سیریز کے لیے بابر اعظم، نسیم شاہ اور شاہین شاہ آفریدی کی دوبارہ اسکواڈ میں شمولیت کا امکان ہے۔
آسٹریلیا کے حالیہ دورے کے دوران اچھی کارکردگی کا مظاہرہ کرنے والے کھلاڑیوں کو سلیکشن کے لیے ترجیح دی جائے گی توقع ہے کہ تمام فارمیٹ کے اسکواڈ میں 18 کھلاڑی شامل ہوں گے۔
ذرائع نے مزید انکشاف کیا ہے کہ حتمی اسکواڈ کا اعلان سیریز شروع ہونے سے قبل کر دیا جائے گا تاکہ کھلاڑیوں کو کنڈیشنز سے ہم آہنگ ہونے میں مدد ملے جنوبی افریقہ کے خلاف سیریز 10 دسمبر سے 7 جنوری تک شیڈول ہے۔
