پاکستان اور افغان طالبان نے جنگ بندی برقرار رکھنے پر اتفاق کر لیا: ترکیہ

پاکستان اور افغان طالبان نے جنگ بندی برقرار رکھنے پر اتفاق کر لیا: ترکیہ

اردو انٹرنیشنل (مانیٹرنگ ڈیسک) جیوز نیوز کے مطابق ترکیہ کی وزارتِ خارجہ کے مطابق پاکستان اور افغان طالبان حکومت نے استنبول میں مذاکرات کے ایک نئے دور کے بعد جنگ بندی برقرار رکھنے پر اتفاق کر لیا ہے۔

ترکیہ کے وزارتِ خارجہ کے جاری کردہ بیان میں کہا گیا عمل درآمد کے مزید طریقہ کار پر تفصیلی گفتگو اور فیصلہ 6 نومبر 2025 کو استنبول میں اعلیٰ سطحی اجلاس میں کیا جائے گا۔یہ مذاکرات 25 سے 30 اکتوبر تک استنبول میں منعقد ہوئے، جن کا مقصد 18 سے 19 اکتوبر کو دوحہ میں طے پانے والی جنگ بندی کو مزید مضبوط کرنا تھا۔

بیان میں کہا گیا کہ تمام فریقین نے ایک مانیٹرنگ اور تصدیقی نظام قائم کرنے پر اتفاق کیا ہے، جو امن کے قیام کو یقینی بنائے گا اور خلاف ورزی کرنے والے فریق پر جرمانے عائد کرے گا۔ترکیہ اور قطر، جو ان مذاکرات کے ثالث ہیں، نے دونوں ممالک کے “فعال کردار” کی تعریف کی اور کہا کہ وہ پائیدار امن و استحکام کے لیے تعاون جاری رکھنے کے لیے تیار ہیں۔

پاکستانی ردِعمل

وزیرِ اطلاعات و نشریات عطااللہ تارڑ نے کہا ہم امید کرتے ہیں کہ اب دہشت گرد کارروائیاں نہیں ہوں گی۔انہوں نے کہا کہ طالبان حکومت کو یقینی بنانا ہوگا کہ اس کی سرزمین پاکستان کے خلاف استعمال نہ ہو۔وزیر نے بتایا کہ کسی بھی خلاف ورزی پر سزائیں مقرر کی جائیں گی۔ انہوں نے مزید کہا کہ جنگ بندی کے معاہدے میں “فِتنہ الخوارج” کے خلاف طالبان کارروائیاں بھی شامل ہیں۔

عطااللہ تارڑ نے کہا ہے کہ اب پاکستان کے پاس ایک نیا فورم ہوگا جہاں وہ سرحد پار دہشت گردی کے ثبوت پیش کر سکے گا۔انہوں نے یہ بھی کہا کہ پاکستان-افغانستان سرحد دوبارہ کھولنے کے فیصلے بعد میں کیے جائیں گے۔

وزیرِ مملکت برائے داخلہ طلال چوہدری نے کہا کہ طالبان حکومت کو بھارت کا “پراکسی” نہیں بننا چاہیے کیونکہ ایسا کرنے سے کابل کی خودمختاری خطرے میں پڑ سکتی ہے۔انہوں نے کہا کہ پاکستان اپنے اصولی مؤقف پر قائم ہے اور امید کرتا ہے کہ مذاکرات مثبت سمت میں آگے بڑھیں گے۔

طلال چوہدری نے جنگ بندی میں توسیع کو پاکستان کے اصولی مؤقف کی فتح” قرار دیا۔انہوں نے کہا پاکستان کے عوام اور امن ہماری سرخ لکیر ہیں۔ بھارت افغانستان کی سلامتی کی ضمانت نہیں دے سکتا۔

مذاکرات کا پس منظر

پاکستان اور افغانستان نے استنبول میں امن مذاکرات اس وقت دوبارہ شروع کیے جب اسلام آباد نے اعلان کیا تھا کہ ابتدائی چار روزہ بات چیت کسی نتیجے پر نہیں پہنچی۔

مذاکرات اس وقت تعطل کا شکار ہوئے جب طالبان نے اس بات کی تصدیق کے لیے قابلِ تصدیق ضمانتیں دینے سے انکار کر دیا کہ تحریکِ طالبان پاکستان (TTP) جیسے گروہ افغان سرزمین کو پاکستان پر حملوں کے لیے استعمال نہیں کریں گے۔

وزیرِ اطلاعات نے تصدیق کی کہ مذاکرات کسی بڑی پیش رفت کے بغیر ختم ہو گئے، حالانکہ پاکستان نے ٹھوس شواہد کے ساتھ اپنے انسدادِ دہشت گردی کے مطالبات پیش کیے تھے۔

پاکستان نے ترکیہ اور قطر کی درخواست پر بات چیت دوبارہ شروع کی تاکہ امن کو ایک اور موقع دیا جا سکے، اور کابل پر بارہا زور دیا کہ وہ اپنی سرزمین کو دہشت گردوں کی محفوظ پناہ گاہ کے طور پر استعمال نہ ہونے دے۔

افغان طالبان کے وفد کے قریب ایک ذریعے نے بتایا کہ زیادہ تر معاملات پر امن طریقے سے اتفاق ہو گیا ہے، تاہم چند پاکستانی مطالبات پر اتفاق کے لیے مزید وقت درکار ہے کیونکہ وہ “مشکل” ہیں۔

وزیرِ دفاع خواجہ محمد آصف نے کہا کہ مذاکرات میں ابھی کوئی بڑی پیش رفت نہیں ہوئی، اور یہ عمل اس وقت ہی آگے بڑھے گا جب کابل اپنا رویہ قطر اور ترکیہ کی رہنمائی میں تبدیل کرے گا۔

انہوں نے خبردار کیا کہ پاکستان کو غیر مستحکم کرنے کی کسی بھی کوشش کا “فیصلہ کن جواب” دیا جائے گا، تاہم پاکستان کابل کے مثبت کردار کا خیرمقدم کرتا ہے — بشرطیکہ طالبان ضد یا بھارت کے آلے کے طور پر کام نہ کریں۔

اسلام آباد-کابل کشیدگی

پاکستان 2021 میں افغان طالبان کے اقتدار میں آنے کے بعد سے خیبر پختونخوا اور بلوچستان میں بڑھتے ہوئے دہشت گرد حملوں کا سامنا کر رہا ہے۔اسلام آباد نے بارہا طالبان حکومت سے مطالبہ کیا کہ وہ ان دہشت گرد گروہوں کے خلاف کارروائی کرے جو پاکستان میں درجنوں حملوں کے ذمہ دار ہیں۔

تاہم طالبان حکومت نے ان مطالبات کو زیادہ سنجیدگی سے نہیں لیا اور متعدد دہشت گرد تنظیموں کو پناہ دی جو پاکستانی سیکیورٹی فورسز اور شہریوں کو نشانہ بناتی رہی ہیں۔12 اکتوبر کو طالبان فورسز نے سرحد پر بلا اشتعال فائرنگ کی، جس کے جواب میں پاکستان نے جوابی کارروائی کی جس میں 200 سے زائد طالبان جنگجو مارے گئے، جبکہ 23 پاکستانی فوجی شہید ہوئے۔

پاکستانی فورسز نے افغانستان کے اندر، بشمول کابل میں، دہشت گردوں کے ٹھکانے تباہ کرنے کے لیے کارروائیاں بھی کیں۔دونوں ممالک کے درمیان کشیدگی اس وقت کم ہوئی جب پاکستان نے 17 اکتوبر کو طالبان حکومت کی درخواست پر عارضی جنگ بندیمنظور کی۔

اس کے بعد دونوں ممالک کے وفود نے دوحہ میں قطر کی ثالثی میں ملاقات کی اور جنگ بندی کے معاہدے پر اتفاق کیا۔ترکیہ نے پھر 25 اکتوبر سے استنبول میں مذاکرات کے دوسرے دور کی میزبانی کی۔تاہم چار روز بعد مذاکرات تعطل کا شکار ہو گئے، جس کی وجہ پاکستانی حکام کے مطابق طالبان وفد کے “غیر منطقی” مؤقف اور “زمینی حقائق سے دور” دلائل تھے۔