اردو انٹرنیشنل (اسپورٹس ویب ڈیسک) تفصیلات کے مطابق دفاعی چیمپئن پاکستان واپڈا اور پاکستان آرمی نے واپڈا اسپورٹس کمپلیکس میں ہونے والی قومی خواتین باسکٹ بال چیمپئن شپ کے سیمی فائنل میں جگہ بنالی۔
واپڈا نے پول راؤنڈ میں لگاتار فتوحات کا سلسلہ جاری رکھتے ہوئے فیصل آباد کو 50-13 سے ہرایا اور چیمپئن شپ میں ناقابل شکست رہتے ہوئے سیمی فائنل میں پہنچ گئی۔
اس میچ میں فیصل آباد کو دفاعی چیمپئن کے خلاف سخت مشکلات کا سامنا کرنا پڑا۔ واپڈا نے ہاف ٹائم میں 19 پوائنٹس کی برتری حاصل کی، جو گیم کے اختتام تک بڑھ کر 40 پوائنٹس کے برتری پر پہنچ گئی۔ واپڈا کی جانب سے حجاب فاطمیم نے 22 پوائنٹس بنائے جبکہ سدرہ حکیم نے 12 پوائنٹس کا اضافہ کیا۔ فیصل آباد کی جانب سے فیروزہ اسلم نے 9 پوائنٹس بنائے۔
دوسرے میچ میں پاکستان آرمی نے اسلام آباد کو 53-21 سے شکست دی۔ پاکستان آرمی کی جانب سے عائشہ دلشاد اور آمنہ محسن بالترتیب 25 اور 10 پوائنٹس کے ساتھ ٹاپ سکورر رہیں۔
پانچ روزہ چیمپئن شپ میں حصہ لینے والی ٹاپ آٹھ ٹیموں میں واپڈا، کراچی، بہاولپور، اسلام آباد، پاکستان آرمی، لاہور، ہزارہ اور فیصل آباد شامل ہیں۔
