عالمی تیل بحران کا اثر، حکومت نے پیٹرول و ڈیزل کی قیمتوں میں ریکارڈ اضافہ کر دیا

اردو انٹرنیشنل (مانیٹرنگ ڈیسک) ڈان نیوز کی خبر کے مطابق مشرقِ وسطیٰ میں جاری کشیدگی کے معاشی اثرات پاکستان تک پہنچ گئے ہیں اور وفاقی حکومت نے پیٹرول اور ہائی اسپیڈ ڈیزل کی قیمتوں میں فی لیٹر 55 روپے تک اضافہ کر دیا ہے۔ نئی قیمتوں کا اطلاق ہفتے سے ہوگا۔

قیمتوں میں اضافے کا اعلان وفاقی وزیر پیٹرولیم علی پرویز ملک نے نائب وزیر اعظم و وزیر خارجہ اسحاق ڈار اور وزیر خزانہ محمد اورنگزیب کے ہمراہ اسلام آباد میں پریس کانفرنس کے دوران کیا۔

نئے نرخوں کے مطابق ہائی اسپیڈ ڈیزل کی ایکس ڈپو قیمت 280.86 روپے سے بڑھا کر 335.86 روپے فی لیٹر کر دی گئی ہے، جبکہ پیٹرول کی قیمت 266.17 روپے سے بڑھ کر 321.17 روپے فی لیٹر ہو گئی ہے۔ اس طرح ڈیزل کی قیمت میں تقریباً 20 فیصد اور پیٹرول میں 17 فیصد اضافہ ہوا ہے۔

حکومت نے پیٹرول پر پیٹرولیم ڈیولپمنٹ لیوی میں 20 روپے فی لیٹر اضافہ کرتے ہوئے اسے تقریباً 105 روپے فی لیٹر تک بڑھا دیا ہے، جبکہ ہائی اسپیڈ ڈیزل پر لیوی 77 روپے سے کم کر کے 57 روپے فی لیٹر کر دی گئی ہے۔

اعلان سے قبل ملک کے مختلف شہروں میں پیٹرول پمپس پر گاڑیوں کی لمبی قطاریں دیکھنے میں آئیں کیونکہ شہری نئی قیمتوں کے اطلاق سے پہلے ایندھن حاصل کرنے کے لیے پمپس کا رخ کرتے رہے۔

پریس کانفرنس میں علی پرویز ملک کا کہنا تھا کہ خطے میں جاری جنگ نے عالمی توانائی منڈی میں شدید غیر یقینی صورتحال پیدا کر دی ہے۔

انہوں نے بتایا کہ پاکستان نیشنل شپنگ کارپوریشن کے دو جہاز اس وقت ینبع اور فجیرہ کے راستے ملک کے لیے تیل لے کر آ رہے ہیں تاکہ سپلائی برقرار رکھی جا سکے۔

عالمی منڈی میں خام تیل کی قیمتوں میں بھی نمایاں اضافہ دیکھا گیا ہے۔ رپورٹس کے مطابق امریکی خام تیل کی قیمت 90 ڈالر فی بیرل سے تجاوز کر گئی جبکہ برینٹ خام تیل تقریباً 92 ڈالر فی بیرل تک پہنچ گیا ہے ۔