معصومہ زہرا
اسلام آباد
پتنگ بازی کوبرصغیر کی ایک قدیم ثقافت کا درجہ حاصل ہے یہ نہ صرف جوش و خروش کا ایک ذریعہ ہے بلکہ مل جل کر بیٹھنے ایک دوسرے کے ساتھ وقت گزارنے اورثقافتی ہم آہنگی کے فروغ کا بھی ایک اہم ذریعہ ہے۔ بسنت سنسکرت زبان کا لفظ ہے جس کے معنی بہار ہیں کیونکہ یہ تہوار ہندی کیلینڈر کے پانچویں مہینے ماگھ کی پانچ تاریخ جدید کیلنڈر کے مطابق ۲ فروری کو منایا جاتا ہے اس لیے اس بسنت پنجمی بھی کہا جاتا ہے۔اس تہوار کی تاریخی اہمیت کا اندازہ اس بات سے بھی لگایا جاسکتا ہے کہ رگ وید جو دنیا کی قدیم ترین کتاب مانی جاتی ہے اس میں بھی اس کا ذکر ملتا ہے۔ ویدوں میں اس تہوار کا تعلق سرسوتی دیوی سے بتایا جاتا ہے جو ہندو مذہب میں فن اور موسیقی کی دیوی سمجھی جاتی ہیں ۔ ویدوں کے مطابق، یہ سرسوتی دیوی کا دن ہے۔ اس دن خوشی منائی جاتی ہے اور سرسوتی دیوی کی پوجا کی جاتی ہے۔ خوشی کے اظہار کے لیے نئے کپڑے پہنے جاتے ہیں اور پتنگیں اڑائی جاتی ہیں اور موسیقی سے لطف اندوز ہوا جاتا ہے۔
تقسیم کے بعد بسنت کا تہوار پاکستان میں بھی ایک مقبول ثقافتی ورثے کے طور پر منایا جاتا ہے خاص کر لاہور میں اس تہوار کا اہتمام انتہائی جوش و خروش کے ساتھ کیا جاتاہے ۔لیکن پنجاب حکومت کی جانب سے پتنگ بازی پر مکمل پابندی عائد کردی گئی ہے۔ پتنگ بازی کے خلاف بنائے گئے نئے قانون کے مطابق پنجاب میں پتنگ بازی کو ایک ناقابلَ ضمانت جرم قرار دیا گیا ہے اور خلاف ورزی کرنے والوں کو پانچ سال قید اور بیس لاکھ جرمانے کی سزا دی جائے گی۔ اس کے علاوہ پتنگ اڑانے والے بچوں پر پہلی بار ۵۰ ہزار جبکہ دوسری بار ایک لاکھ جرمانہ مقرر کیا گیاہے۔
حکومت کا مؤقف ہے کہ یہ قانون عوامی تحفظ کو یقینی بنانے کے لیے بنایا گیا ہے ، کیونکہ اس تہوار کے دوران استعمال ہونی والی دھاتی ڈور کے نتیجے میں کئی قیمتی جانوں کا ضیاں ہوا ہے ۔اس کے علاوہ پتنگ اڑاتے ہوئے کئی بچے چھتوں سے نیچے گرتے ہیں یہی نہیں اکثر شہری اس تہوار کے موقع پر پتنگ بازوں کی جانب سے چلائی گئی گولیوں کا بھی نشانہ بنتے ہیں ، جس کے نتیجے میں ہر سال بسنت کے موقع پر پاکستانی عدالتوں میں مقدمے درج ہوتے ہیں۔ ان مسائل کی روشنی میں حکومت نے اس تہوار پر مکمل پابندی عائد کردی ہے۔
تاہم ناقدین کا کہنا ہے کہ صدیوں پرانی اس روایت پر اتنی سخت قانون سازی غیر منصافانہ ہے ۔ بسنت پاکستان کا ایک مقبول ثقافتی تہوار ہے اور اس کی تاریخ برصغیر میں صدیوں پر محیط ہے۔ اس قدیم تہوار کی بقا کے لیے ہم دنیا کے دیگر ممالک کے کیے گئے اقدامات سے بھی سیکھ سکتے ہیں مثال کے طور پر جاپان کے ہم فیسٹیول سے لے کر گجرات میں ہندوستان کے بین الاقوامی پتنگ میلے تک ان ممالک کی حکومتوں نے ان تہواروں کی سرپرستی کی اور عوامی تحفظ کو یقینی بنانے کے لیے پتنگ بازی کے لیے مخصوص جگہوں کا تعین کیااور خاص قسم کی دھاتی ڈوروں پر پابندی لگا کر اس قدیم روایت کو زندہ رکھا اور عوام کے تحفظ کو بھی یقینی بنایا۔
اس کے علاوہ پتنگ بازی کو غیر اسلامی قرار دیے جانے والے حالیہ مذہبی بیان نے اس تہوار کی بقا کو مزید نقصان پہنچایا ، اس بیان کی وجہ سے نہ صرف ایک عوامی مسئلے کو مذہبی بحث میں بدل دیا گیا بلکہ اس بیان نے اس قدیم ثقافتی ورثے کو غیر اخلاقی سرگرمیوں کے ساتھ جوڑ دیا جبکہ حقیقت یہ ہے بسنت صرف ایک ثقافتی اور تفریحی تہوا ر ہے اس کا مذہب اور اخلاقیات سے کوئی تعلق نہیں ہے۔
ماہرین کا کہنا ہے کہ اس مخصوص ثقافتی روایت کو زندہ رکھنے کے لیے مخصوص افراد کا تعین کیا جائے ،ان افراد کو خصوصی اجازت نامے دیے جائیں اور پتنگ بازی میں استعمال ہونے والے مواد کے محفوظ استعمال کو یقینی بنائے جائے۔ اس اقدام سے نہ صرف عوامی تحفظ کو یقینی بنانے میں مدد ملے گی بلکہ اس ثقافتی ورثے اور اس سے جڑے روزگار کے مواقعوں کو بھی محفوظ بنایا جاسکتا ہے۔ حکومت کو اس پہلو پر بھی غور کرنے کی ضرورت ہے کہ کسی قوم کی ثقافتی روایات کو مکمل طور پر ختم کرنا اس قوم کی آنے والی نسلوں کو ان کی تاریخ ، روایات اور ثقافت سے محروم کرنے کے مترادف ہے۔
