اردو انٹرنیشنل (اسپورٹس ویب ڈیسک) تفصیلات کے مطابق سعودی عرب میں ہونے والے ہسپانوی سپر کپ کے فائنل میں بارسلونا نے شاندار کھیل کا مظاہرہ کرتے ہوئے ریال میڈرڈ کو 5-2 سے شکست دے دی اور اپنی تاریخ میں 15ویں بار ٹرافی جیت لی۔
ریال میڈرڈ نے کھیل کا آغاز بھرپور انداز میں کیا، اور ایمباپے نے ہاف وے لائن سے دوڑتے ہوئے شاندار سولو گول کر کے اپنی ٹیم کو ابتدائی برتری دلائی۔
تاہم بارسلونا کی جانب سے کھیل کے 22ویں منٹ میں، لیمائن یامل نے رابرٹ لیوینڈوسکی کے پاس پر شاندار گول کیا اور اسکور 1-1 کردیا ۔ اس کے بعد بارسلونا نے وقفے سے قبل تین مزید گول کر کے کھیل پر مکمل کنٹرول حاصل کر لیا۔
لیوینڈوسکی نے گیوی کے فاؤل ہونے پر پنالٹی کے ذریعے ٹیم کو برتری دلائی۔ اس کے تین منٹ بعد، رافینہا نے ہیڈر کے ذریعے بارسلونا کے لیے تیسرا گول کیا۔
اور پھر پہلے ہاف کے اضافی وقت میں برازیلین ونگر رافینہا نے ایلکس بالڈے کو چوتھا گول کرنے میں مدد فراہم کی۔
دوسرے ہاف میں بارسلونا نے اپنی برتری مزید بڑھائی جب رافینہا نے کھیل کا اپنا دوسرا اور ٹیم کا پانچواں گول کیا۔ ریال میڈرڈ کو ایک اور جھٹکا اس وقت لگا جب ان کے گول کیپر شیزنی کو ایمباپے کو فاؤل کرنے پر ریڈ کارڈ دکھا کر میدان سے باہر کر دیا گیا۔
برازیل کے فارورڈ روڈریگو نے ایک شاندار فری کِک کے ذریعے ریال کے لیے دوسرا گول کیا، لیکن ریال میڈرڈ مزید پیش رفت کرنے میں ناکام رہااور بارسلونا نے میچ 5-2 سے جیت لیا۔
یہ بارسلونا کے کوچ ہینسی فلک کے تحت دو “کلاسیکو” میں دوسری بڑی کامیابی تھی۔ اس سے پہلے اکتوبر میں بارسلونا نے ریال میڈرڈ کو لا لیگا میں 4-0 سے شکست دی تھی۔
