خامیوں سے بھرا منصوبہ،کیا ڈونلڈ ٹرمپ اور بنیامین نیتن یاہو نے دھوکے میں رکھا؟
ڈان نیوز اپنے ایڈیٹوریل میں لکھتا ہے کہ ایسا محسوس ہوتا ہے کہ مسلم دنیا کے رہنماؤں کو ڈونلڈ ٹرمپ اور بنیامین نیتن یاہو نے دھوکے میں رکھا۔ اگرچہ کئی مسلم حکومتوں، بشمول ہماری اپنی نے ابتدائی طور پر 20 نکاتی غزہ ’امن‘ منصوبے کا خیرمقدم کیا، مگر جب انہیں اس منصوبے کی اصل حقیقت فلسطینیوں کی ہتھیاری، اسرائیل کی چھوٹ اور غزہ پر نوآبادیاتی کنٹرول کا اندازہ ہوا تو وضاحتوں اور وضاحتی بیانات کا سلسلہ شروع ہوگیا۔
ڈان نیوز کے مطابق میڈیا رپورٹس سے معلوم ہوتا ہے کہ اسرائیلی وزیراعظم نیتن یاہو نے اس منصوبے میں ایسی تبدیلیاں کیں جو اس اصل مسودے کا حصہ نہیں تھیں جس پر امریکی صدر ٹرمپ نے گزشتہ ہفتے نیویارک میں کئی مسلم ممالک کے رہنماؤں سے بات چیت کی تھی۔ شاید یہی وجہ ہے کہ وزیرِ خارجہ اسحاق ڈار کو منگل کو وضاحت کرنی پڑی کہ ’’یہ ہمارا دستاویز نہیں ہے‘‘ حالانکہ وزیراعظم شہباز شریف نے ابتدا میں خاصی خوشی کا اظہار کیا تھا۔ دیگر مسلم ممالک، بشمول سعودی عرب، مصر اور ترکی، بھی امریکی-اسرائیلی چال سے حیران رہ گئے۔ رپورٹس کے مطابق قطری قیادت نے امریکہ سے درخواست کی تھی کہ منصوبے کے اعلان میں تاخیر کی جائے، مگر واشنگٹن نے یہ درخواست مسترد کردی۔
اگر منصوبے میں اسرائیلی ردوبدل کی یہ اطلاعات درست ہیں — اور اس منصوبے کے شرمناک نکات دیکھ کر اس میں شک کی گنجائش کم رہ جاتی ہے — تو مسلم دنیا کو اپنے آپ سے کچھ اہم سوال پوچھنے ہوں گے۔
سب سے پہلے یہ کہ اسرائیل کس طرح اس معاہدے کو بدلنے میں کامیاب ہوگیا جسے کئی مسلم ممالک پہلے ہی قبول کرچکے تھے، اور امریکہ نے ایسا ہونے کیوں دیا؟
دوسرا یہ کہ یہ منصوبہ فلسطینیوں کی رائے اور شمولیت کے بغیر کیسے حتمی شکل اختیار کر گیا — حالانکہ وہی سب سے زیادہ اسرائیلی ظلم و تشدد کا شکار ہیں؟
یہ منصوبہ عملی طور پر حماس کو غیر مؤثر بناتا ہے اور فلسطینی اتھارٹی کو اس کی جگہ پر رکھتا ہے، یہاں تک کہ وہ اسرائیل سے معافی مانگے اور اپنے ’گناہوں‘ کا کفارہ دے۔ اگر فلسطینیوں کی دونوں بڑی جماعتوں کو ہی اس منصوبے سے باہر رکھا گیا ہے تو پھر غزہ پر حکومت کون کرے گا؟
کیا وہ فلسطینی ’ٹیکنوکریٹس‘ جو اس مقبوضہ خطے کی انتظامیہ چلائیں گے، اسرائیل کے سامنے وفاداری کا حلف اٹھائیں گے اور ایک قابلِ عمل فلسطینی ریاست کے قیام کی تمام خواہشات سے ہمیشہ کے لیے دستبردار ہوجائیں گے؟ یہی احساس اس شرمناک دستاویز کو پڑھ کر ابھرتا ہے۔
مزید یہ کہ اس منصوبے میں دو ریاستی حل کے لیے کسی واضح روڈمیپ کا ذکر نہیں کیا گیا، جس میں یروشلم کو فلسطینی دارالحکومت تسلیم کیا جائے۔ صرف ایک مبہم سا جملہ دیا گیا ہے کہ ایک ’’قابلِ اعتبار راستہ‘‘ فراہم کیا جائے گا۔
حقیقت یہ ہے کہ اس منصوبے میں کوئی اعتبار نہیں اور اس کے کامیاب ہونے کے امکانات تقریباً صفر ہیں۔
رپورٹس بتاتی ہیں کہ حماس کے لیے اسے قبول کرنا مشکل ہوگا جبکہ حتیٰ کہ فتح کی صفوں سے بھی اختلاف کی آوازیں بلند ہو رہی ہیں۔ صدر ٹرمپ نے دھمکی دی ہے کہ اگر حماس نے اس منصوبے کو رد کیا تو اسے ’’بہت افسوسناک انجام‘‘ کا سامنا کرنا پڑے گا۔
دریں اثنا اسرائیل غزہ کے عام شہریوں پر بمباری جاری رکھے ہوئے ہے جبکہ حماس کے جواب کا انتظار کیا جا رہا ہے؛ یہ سب کچھ اس بات کو ظاہر کرتا ہے کہ تل ابیب امن کے لیے کتنا ’پُرعزم‘ ہے۔
اگر اور جب یہ ڈھونگ ٹوٹتا ہے تو مسلم رہنماؤں کو یہ ضرور سوچنا چاہیے کہ انہوں نے امریکہ اور اسرائیل پر اندھا اعتماد کرکے اس کے بدلے میں کیا حاصل کیا۔
