غزہ فلوٹیلا کے 430 کارکن اسرائیل منتقل، متعدد ممالک کی مذمت

اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق اسرائیلی حکام نے کہا ہے کہ غزہ کے لیے روانہ ہونے والے امدادی فلوٹیلا میں شامل 430 کارکنوں کو سمندر میں روک کر اسرائیل منتقل کیا جا رہا ہے۔ یہ فلوٹیلا ترکیہ سے گزشتہ ہفتے روانہ ہوا تھا اور اس میں تقریباً 50 بحری جہاز شامل تھے۔

اسرائیلی وزارت خارجہ کے ترجمان کے مطابق تمام 430 افراد کو اسرائیلی بحری جہازوں کے ذریعے منتقل کیا جا رہا ہے جہاں انہیں اسرائیل لایا جائے گا اور وہ اپنے قونصلر نمائندوں سے ملاقات کر سکیں گے۔ ترجمان نے اس فلوٹیلا کو  اسٹنٹ قرار دیتے ہوئے کہا کہ یہ مہم حماس کے حق میں پروپیگنڈا کے طور پر استعمال کی جا رہی تھی اور اسے ناکام بنا دیا گیا ہے۔

اسرائیلی وزیراعظم بنجمن نیتن یاہو نے بھی اس واقعے پر ردعمل دیتے ہوئے کہا کہ یہ فلوٹیلا ایک بدنیتی پر مبنی منصوبہ تھا جس کا مقصد غزہ میں حماس کے خلاف عائد ناکہ بندی کو کمزور کرنا تھا۔

اس کارروائی کے بعد عالمی سطح پر شدید ردعمل سامنے آیا ہے۔ امریکہ نے فلوٹیلا سے منسلک چار افراد پر پابندیاں عائد کرتے ہوئے انہیں سرگرمیوں سے منسلک قرار دیا ہے۔

پاکستان سمیت 10 ممالک نے مشترکہ بیان میں اسرائیلی اقدام کی سخت مذمت کی ہے۔ اس بیان پر ترکیہ، بنگلہ دیش، برازیل، کولمبیا، انڈونیشیا، اردن، لیبیا، مالدیپ اور اسپین کے وزرائے خارجہ نے دستخط کیے۔ مشترکہ اعلامیے میں کہا گیا کہ گلوبل سمڈ فلوٹیلا ایک پرامن انسانی مشن تھا جس کا مقصد غزہ میں سنگین انسانی صورتحال کو اجاگر کرنا تھا اور اس پر حملہ ناقابل قبول ہے۔

انڈونیشیا کی وزارت خارجہ کے مطابق اس کے 9 شہریوں کو اسرائیل نے گرفتار کر لیا ہے، جبکہ ان میں دو صحافی بھی شامل ہیں۔ انڈونیشیا نے فوری رہائی کا مطالبہ کرتے ہوئے کہا ہے کہ تمام سفارتی اور قونصلر ذرائع استعمال کیے جائیں گے۔

رپورٹس کے مطابق فلوٹیلا میں شامل افراد آئرلینڈ کے 15 شہری بھی تھے جن میں صدر کیتھرین کونولی کی بہن مارگریٹ کونولی بھی شامل ہیں۔

یہ فلوٹیلا غزہ کے لیے انسانی امداد لے کر جا رہا تھا جہاں اسرائیل 2007 سے ناکہ بندی برقرار رکھے ہوئے ہے۔ اکتوبر 2023 کے بعد سے جاری شدید اسرائیلی کارروائیوں کے باعث غزہ میں خوراک، ادویات اور بنیادی ضروریات کی شدید قلت پیدا ہو چکی ہے، جبکہ بعض اوقات امدادی ترسیل بھی مکمل طور پر روک دی گئی ہے۔

گزشتہ ماہ بھی ایک ایسا ہی فلوٹیلا یونان کے قریب بین الاقوامی پانیوں میں روکا گیا تھا اور زیادہ تر کارکنوں کو یورپ واپس بھیج دیا گیا تھا۔