اردو انٹرنیشنل (اسپورٹس ویب ڈیسک) تفصیلات کے مطابق ٹوٹنہم کے منیجر اینگے پوستیکوگلو نے اپنی ٹیم کی موجودہ کارکردگی پر روشنی ڈالتے ہوئے کہا کہ ان کی ٹیم اس وقت ایسی حالت میں ہے کہ یہاں تک کہ لیورپول کے اسٹار ونگر محمد صلاح جیسے عالمی معیار کے کھلاڑی بھی زیادہ اثر نہیں ڈال پائیں گے۔
پوستیکوگلو کی ٹیم اس وقت پریمیئر لیگ میں 12 ویں نمبر پر ہے اور اپنے آخری چار میچوں میں سے تین میں شکست کا سامنا کر چکی ہے۔ جبکہ بدھ کو ٹوٹنہم کا لیگ کپ سیمی فائنل کے پہلے مرحلے میں پریمیئر لیگ کی ٹاپ ٹیم لیورپول سے مقابلہ ہے۔
Photo-Getty Images
محمد صلاح، جو اس سیزن میں 21 گول اسکور کر چکے ہیں اور 17 گول میں اسسٹ کر چکے ہیں، کے بارے میں بات کرتے ہوئے پوستیکوگلو نے کہا:
“صلاح ایک عالمی معیار کے کھلاڑی ہیں، لیکن اگر آپ انہیں ہماری موجودہ ٹیم میں شامل کریں تو وہ اس سطح کی کارکردگی نہیں دکھا سکیں گے کیونکہ ہم ایک گروپ کے طور پر جدوجہد کر رہے ہیں۔”
پوستیکوگلو نے اپنے کپتان سون ہیونگ من کی تعریف کرتے ہوئے کہا کہ وہ لیورپول کی موجودہ ٹیم میں شامل ہو کر شاندار کارکردگی دکھا سکتے ہیں۔ انہوں نے کہا:
“اگر آپ سونی کو لیورپول کی ٹیم میں شامل کرتے ہیں تو وہ بہتر گول اسکورنگ ریکارڈ قائم کر سکتے ہیں۔ لیکن مجھے یقین ہے کہ جب ہم بہتر کھیلیں گے، تو سونی کی کارکردگی میں بھی بہتری آئے گی۔”
ٹوٹنہم نے سون ہیونگ من کے معاہدے میں ایک سال کی توسیع کا اعلان کیا ہے، جو ان کی اہمیت کو ظاہر کرتا ہے۔
