اردو انٹرنیشنل اسپورٹس ویب ڈیسک تفصیلات کے مطابق پاکستان نے انڈر 18 ایشین بیس بال چیمپئین شپ میں شرکت کرنی ہے مگر پاکستان فیڈریشن بیس بال کو چائینیز تائپے ٹیم بھیجنے کا این او سی نہ مل سکا۔
اس بارے میں بیس بال فیڈریشن کے سیکریٹری فخر علی شاہ کا کہنا ہے کہ پاکستان اسپورٹس بورڈ (پی ایس بی) نے این او سی جاری نہ کرنے کا لیٹر بھجوا دیا ہے اور لیٹر میں کہا گیا ہے کہ حکومت چائینیز تائپے میں ایونٹس میں شرکت کی اجازت نہیں دیتی ہے۔
خط میں لکھا گیا ہے کہ حکومت پاکستان ون چائنا پالیسی پر عمل درآمد کرتی ہے لہٰذا حکومتی پالیسی کی وجہ سے این او سی جاری نہیں کیا جا سکتا ہے۔
سیکریٹری فخر علی شاہ کہتے ہیں کہ پی ایس بی نے خود جواب دے دیا ہے کہ ہمارا کیس وزارت خارجہ کو نہیں بھجوایا گیا ہے۔
فخر علی شاہ نے کہا کہ پاکستان سینئر ٹیم گزشتہ برس چائنیز تائپے میں ایشین بیس چیمپئین شپ کھیل چکی ہے اور اگر ہم نے ایونٹ میں شرکت نہ کی تو ہمیں بھاری جرمانہ عائد ہو گا۔
انہوں نے یہ بھی کہا کہ ہماری نان ری فنڈ ایبل ائیر ٹکٹس بک ہیں ، آن آرائیول ویزہ ملے گا، فیڈریشن اپنے تمام اخراجات خود برداشت کر رہی ہے۔
بیس بال فیڈریشن کے سیکریٹری نے کہا کہ ایشین چیمپئین شپ ورلڈ انڈر 18 چیمپئین شپ کاکوالیفائنگ راؤنڈ ہے اور عدم شرکت پر بھاری جرمانہ ہو سکتا ہے جبکہ پابندی کا بھی خدشہ ہے لہٰذا ہماری درخواست ہے کہ ہمارے کیس کو از سر نو دیکھا جائے۔
واضح رہے کہ انڈر 18 ایشین بیس بال چیمپئین شپ 2 سے 8 ستمبر تک چائینیز تائپے میں شیڈولڈ ہے۔
